【转行仲好揾】林芊妤瑜伽照显功架：私人教班$2000一个钟

尚记得2009年底，卫兰推出嘅唱片《Wish》，里面有咩歌大家未必讲得出，不过封面𠮶一张高难度瑜伽动作图，就绝对系印象深刻：双脚向后拗再屈番落膊头，双手捉住双脚，简直系违反人体工学。卫兰呢张当然系后制整出嚟，但原来真系可以做得到，Coffee林芊妤最近上载一张九成似嘅瑜伽相，佢接受香港01访问时话：“唔系专登向卫兰致敬，不过并埋睇又真系几似㖞哈哈哈。”

Coffee上载一张瑜伽动作照，相中佢以颈作支撑点，双脚向后反，脚板底贴住头顶……呢个瑜伽动作除咗要柔软度十足都需要一定技巧，Coffee喺12年考到国际瑜伽导师认可资格，教授瑜伽近6年时间，对佢嚟讲当然系易如反掌啦，佢接受香港01访问时就分享做呢个Pose嘅重点：“呢个动作话难唔难话易唔易，首先要Back Bending足够，除咗柔软度原来仲好考平衡力，因为当只脚放上去时，好容易会左右移动。”

问到系咪想向卫兰致敬，Coffee就哈哈大笑话：“其实无谂过系向卫兰致敬，纯粹系影宣传相谂一个瑜伽动作，不过见到网民拼埋两张相，睇落又真系几似，哈哈哈。”

呢张相其实系Coffee为瑜伽班招生影嘅宣传照，上载唔到10分钟已经名额爆满，睇嚟市场需求好大噃，“而家教堂都真系好密，之前自己只教私人班，同埋拍片上自己嘅YouTube频道。开咗个人频道之后多咗女仔话想跟我上堂，不过私人班又唔系好负担到，所以而家抽少少时间开班教学，教佢地一啲瑜伽正确知识，希望佢地学完喺屋企都可以做到练习。”

市面上瑜伽堂嘅学费，小班教学由$100一堂起跳，私人教学约$500起，想跟Coffee上堂又要几钱学费呢？“私人就$2000一个钟，Group Class就 $500一位，暂时都系开过两三班。”以Coffee密密麻麻嘅时间表嚟睇，收入咪好可观？“都OK啦，自己都想继续喺幕前工作，只系而家会拣啰，唔会咩都接，因为始终时间每日得24小时，都希望拣啲有意义嘅嘢，遇到适合工作先接。”