【名模Secret】陈嘉容少吃多运动：想行骚无5呎9吋唔使谂　　　

世上存在一个永恒不变的现象，就是总有不少女生梦想做model，踏上天桥演绎最时尚的新装，到底天桥上的风光是否真的如此吸引？天桥下又有甚么鲜为人知的辛酸？本地星级名模陈嘉容 （Eunis）就大爆模界Secret，让各位一心想做model的女生更加了解这一行。那么要怎样才有机会做model踏上天桥行骚呢？Eunis表示：“最少都要有5呎9吋高，无5呎9吋唔好谂喇。”原来想做专业的行骚model门槛要咁高，换句话说即是天生的啦，身高未达标的唯有放弃吧。但大家又不用这么灰心，Eunis话：“咁做唔到行骚model，都可以做硬照或者广告model嘅。”

Eunis透露本地model的薪酬：“影editorial即系报纸、时装杂志𠮶啲嘅价钱系$800-$1000影4个钟连化妆set头，呢个价系咁多年都无加过，无论系初入行定名模个价都一样，有啲得$500都有，咁如果本时装杂志系好出名嘅你影唔影吖？拍广告就系最多钱嘅，以时薪计，新入行都有$1000-$1500一个钟，出名嘅model就以job计，香港嘅广告都有几十万，如果大陆嘅话就几百万人民币都有，咁如果系国际超模就有7位数字美金添。至于fashion show方面，初入行喺香港行骚嘅model一般收$2000-$3000一个job，top model嘅话就几万蚊。不过行骚嘅工作时间好长，要早几个钟去彩排同化妆set头做准备，好多时都做成7、8个钟，甚至十几个钟㗎。”

Eunis行一场骚就等如普通打工仔的月薪有多，的确好吸引，但前提是要有高䠷身形再加fit爆身材，身高是天生，身材就可以靠做运动来操练，当然仲要节制饮食啦。Eunis为了keep住副咁fit的身材原来也相当刻苦，“1星期最少做4次运动，每次1-2小时，会做瑜伽、做Gym、打boxing同埋跳舞等，都会做sit up，每次做300下包括前向100下，左右两侧各100下，咁样个线条先至靓。饮食方面以清淡为主，戒绝冻饮，晚餐戒淀粉质，基本上食完午餐之后就唔会再食任何淀粉质，我已经有15年嘅晚餐无食过饭喇，而夜晚8时后都唔会再食嘢。”