【森美旅行团】高海宁做食评家够真心：真系好味嘅呃唔到人

睇无线节目《森美旅行团》最令大家开心的除了是有得睇高海宁 (高Ling0、黄心颖两个靓女浸温泉兼同场加映森美骚肌之外，相信一定是睇几位主持人介绍各种美食喇。在寻晚播出的一集就介绍了几间东京人气食店，包括高级寿司店、抹茶盛宴、水果甜品店以及汉堡包店。既然介绍得自然间间都有返咁上下水准啦，而当中的美食经高Ling真情流露七情上面加上用词丰富而又有层次的描述后，就变得更加美味同吸引了。

而高Ling的食后感都好有参考价值，绝非那些只会不停话好好味又或是甚么有口感一类hea爆食评可比。例如：“酱油入面渗出柚子香味”、“香之余带甜味”、“有啲烟熏味，好似拎好多木头喺下面熏嘅味道”、“将啲蟹膏混入蟹肉捣碎然后拎去炸，咬落去好似爆浆咁”等等。有网民甚至大赞高Ling似十足食评家“形容到我好似食到啲味道咁”，就知高Ling言之有物，有料到啦。

香港01记者就电话访问了高Ling，并告知她的食评大获好评，她说：“我真系好钟意食嘢，好为食，我只系将食到嘅味道讲出嚟，形容多啲，系自己最真嘅感觉，系本能嚟。(可以转做食评家？) 无咁夸张，一向都好enjoy食嘢，以前拍过好多饮食节目，所以啲朋友好多时都会问我有咩好嘢食推介，寻晚𠮶集播出咗之后都有好多人问我，因为有啲朋友嚟紧都会去东京旅行。”

高Ling坦言所讲的食后感完全是发自内心的：“我系真心觉得好食，我个样会表现晒出嚟，好味嘅话我会讲到好兴奋，呃唔到人，亦都唔想呃人。𠮶个蟹汉堡真系好好食，真心推介，好惊喜，好鲜味好浓郁好足料，通常去日本都唔会特登走去食汉堡㗎嘛，点知原来系咁正，依家仲回味紧。我𠮶日都即刻加咗间店个老板嘅ig，惊第日揾唔返间店，百几蚊一个其实系好抵，好值。”成日食食食怎样可以keep住身材呢？高ling说：“我拍时有肥到㗎，以前系一集比一集肥，依家我学识喇，净系拍嘢时先食嘢，放饭时就唔食，咁就唔会一日食成6、7餐。我拍嘢时会尽情食，因为我真系好钟意食嘢，同埋如果唔系咁观众feel唔到有几好食。”