【森美旅行团】黄心颖打瓦片冇难度　挑战超辣拉面半夜肚痛

由森美、黄心颖、麦美恩、高海宁主持的《森美旅行团》，播出至今，口碑不俗，网民大赞森美做足功课，令观众娱乐之余亦学到嘢，而且跟几位女拍档感觉甚为互动，制造轻松笑料，网民甚至认为半小时有点意犹未尽。不过观众睇得过瘾，原来笑声背后，黄心颖她们却有很大付出，值得给她们一个Like。

森美一行人在节目中齐齐去试宇宙第一特辣拉面，当时森美、黄心颖、高海宁一人一碗拉面，各自选择不同辣度，而高海宁拣选了最辣，黄心颖就中辣，而最古惑的森美就拣了少辣，两个女仔先行起筷，只见黄心颖辣到标眼水，之后仲出现“丰唇”效果，而试最辣的高海宁，亦即时成块面红晒，确实是惨惨猪，看得网民十分心痛。到了森美起动，只是吃了两口，已经面容扭曲，额角还开始冒汗，睇到这里以为完场，原来还有无出街的精华。

黄心颖接受《香港01》访问说：“食拉面呢part都好好笑，初初好雀跃嘅，森美仲话妳哋真系食咁辣呀，唔好博呀，猛系侧边叫我哋唔好、唔好，当时佢真系好好笑。但我食食下开始打嗝，之后就成个人呆咗，因为真系好辣，仲开始胃痛，嘴又肿晒，拍完之后高Ling仲呕添呀。（你哋食晒一整碗辣拉面？）都系食咗两三啖，拍完之后慢慢渗出嚟，觉得胃痛之后，我哋咪饮奶中和返啰。我夜晚返到去酒店仲肚痛，可能移到去肠度，咪肚痛啰。（仲敢唔敢试？）下次会轻手啲啰，其实系好食嘅，不过太辣啫。”

除了劲辣拉面，节目中还有芫茜拉面，见到一大锅芫茜上台，又是一次超级挑战，但今次却没有黄心颖份，问到她想食超辣拉面还是芫茜拉面？她笑说：“俾我拣我全部都想试，而且我钟意食芫茜嘅，反而佢哋几个全部唔钟意食嘅。（为何不是由你上阵？）每人都有啲唔同嘅项目，有啲系拍独处时间，所以𠮶part无我，但俾我下次去日本，自己都会去试，昨晚睇返都觉得好好食咁。”

在节目中还有一part是介绍日本现时至流行的“劈瓦减压”，顾名思义，就是徒手劈碎瓦片，玩之前要签下生死状，而且只有一次机会，当然无得彩排啦，最令人意想不到是大大只的森美，只是劈开4块瓦片交货，反而黄心颖就爆发小宇宙，挑战15块瓦片，最后更成功劈碎12块，劲到爆裂，全场哗然。

黄心颖就笑言：“工作人员好简单示范咗一次，叫我哋劈落去红色个点度，但都系劈一次架。我都算好大力嘅，记得有次去海洋公园玩揼锤仔，我系一嘢揼到上顶，赢咗好大只公仔，𠮶时有啲朋友已经叫我做大力B。可能自己有跳开舞，知道啲力由乜嘢地方发出，由脚去到腰，再去到手，然后点样用力，后尾睇返啲留言都好好笑，话我完全识得点样运劲。”心颖仲话劈完那一刻突然呆咗，“打咁多块瓦片系我要求嘅，谂住打到咪打，打唔到咪算啰，点都试下呀嘛。无谂过打到咁多块，当时可能肾上腺素急升，冇乜点样觉得痛。”心颖个样咁娇滴滴，原来出手都几劲，绯闻男友马国明不要行差踏错呀。