龙虎豹合体开live　阿娇讲嘢咬字唔清：唔明点解我变咗低能　

前排阿娇（钟欣潼）取代黎明做金句王，自“个个都想拍拖，唔通个个都想拍拖咩”之后，吓到张智霖都畀唔切反应，之后又冇啦啦讲咩“唔通养狗唔可以嫁兽医”，真系完全估佢唔到，就连身边嘅好姊妹阿Sa（蔡卓妍）都救唔切场，究竟系阿娇思维太跳脱定系大家转数唔够快呢？

寻日（1/11）有广告商睇中英皇龙虎豹（容祖儿、阿Sa、阿娇），喺Facebook开直播做宣传，三个女仔一个墟，何况佢哋已经识咗成十几年，坐埋一齐好似开笼雀咁嘈到不得了。Joey话原来佢哋私底下虽然好老友，但工作上好少有机会合作，所以平常都系用Whatsapp联络多。之后又解释“英皇龙虎豹”呢个名嘅由来，Joey搞笑话：“可能因为我块面大所以做龙。阿娇钟意豹纹所以系豹，而且佢跑得够快。”身边嘅阿娇一直都想插嘴但又冇机会，终于都开到口：“因为我钟意‘Chair大炮’。”主持人追问点解叫“龙虎豹”唔叫“鱼虾蟹”，佢就话：“因为佢哋唔会去运动场，尴尬啰，被人踩。”

大家当然最想知道金句“唔通养狗唔可以嫁兽医”，容祖儿同阿Sa力撑呢句说话一讲就明，今次阿娇唔怕尴尬亲自解画：“𠮶个记者问我，你系香港某集团代言人，咁你又去人哋𠮶间医美，又同咗𠮶个人一齐，咁我做代言人唔代表唔可以同𠮶个人一齐架嘛。”就系咁简单，其实系阿娇谂嘢快到大家捉唔到佢路啫，之后佢笑住咁话：“我都唔明点解我变咗低能，因为颈痛，我𠮶日睇完个新闻话条颈真系好重要，要好好保护条颈，咁条颈真系重要架嘛系咪先！我觉得啱嘅！”

阿娇嘅情绪真系异常高涨：

今日好可惜听唔到阿娇讲金句，但唔知由几时开始，发现阿娇做访问时都口齿唔伶俐，讲嘢一旧旧咁，又跳Tone九唔搭八，唔通蜜运中嘅女人，连好姊妹Joey都忍唔住讲句：“你觉唔觉阿娇今日讲野特别大声！”当大家系度倾计时，阿娇又拎住个玩具“尖叫鸡”系咁玩，又口噏噏咁话：“白切鸡！白切鸡！”唔知阿娇系咪因为同好姊妹一齐做嘢，情绪特别高涨，真系好难捉摸啊！