【爸爸去哪儿】陈小春冲过去想锡小泡芙　嗯哼呷醋O晒嘴：干嘛呢

大陆综艺节目《爸爸去哪儿5》大家最钟意睇就系恶爸陈小春同暖男囝囝Jasper之间嘅温馨互动，但其实陈小春同刘畊宏个囡小泡芙呢一对仲好睇！由第一集开始，佢已经对小泡芙虎视眈眈，成日都赞佢可爱，不时透露自己如果有个好似小泡芙咁可爱嘅囡就好喇，但可惜之前应采儿上节目讲过，陈小春基因太强，生囝似佢就冇所谓，但如果生囡都好似陈小春就唔系太好喇。

陈小春虽然成日呼喝Jasper，但对住小泡芙佢就完全唔同晒，之前讲过佢对住小泡芙个态度会特别温柔，从未试过唔耐烦，小泡芙做掌上压，佢就默默咁帮佢拎起衫尾怕整污糟。上集又主动帮小泡芙戴手套，仲亲自一对一教佢摘火龙果，真系亲生囝Jasper都未试过有咁好享受。

今集陈小春仲夸张，讲到一班小朋友系船上面玩游戏唱歌仔，小泡芙就自荐自己要唱《爸爸去哪儿》嘅主题曲，仲话要唱个快版，把声超级嗲！头号粉丝陈小春听到好冧，好似堕入爱河咁，最后仲忍唔住冲上去揽住小泡芙话：“我想亲你啊！”身边嘅刘畊宏完全反应唔切，而嗯哼直程O晒嘴问陈小春：“干嘛呢？”陈小春恨囡真系恨到出晒面，唔知应采儿见到呢个画面会唔会认真考虑为Jasper加添个妹妹呢？

直撃陈小春冲上去小泡芙度嘅过程：