【专访．有片】陈柏宇为个唱操练出大胸 　透露嘉宾：未合作㗎！

还记得陈柏宇早年上载过一张6嚿腹肌嘅猛男相，确系赏心悦目，原本打算藉住呢个访问喺健身房进行，可以叫佢骚骚肌，结果佢竟然拉亲条腰！见佢玉背贴上大大块止痛贴，真系名符其实陈伯。“今朝起身鼻敏感打喷嚏时，唔小心拉亲条腰，不过呢啲好快好返。”距离演唱会尚余一个多个月，陈伯真系要好好保重身体。

虽然个唱上陈柏宇系唔会露肌，但佢就话可能届时会有啲真空西装，所以健身是必要的，而一讲到健身，佢就即时以专家口吻讲出好多听完都未必明嘅理论，更强调自己唔系为追求大只而健身。“啲人话我脚幼，但我本身喜欢卡通人物身形，即系slim得嚟有少少肌肉𠮶只，所以好少操脚。如果想有腹肌而啲线条又现的话，最简单就系瘦，脂肪比例低的话，少少线条已经好明显。”按陈伯所讲，他1星期大概会操4日，每次约两三小时，随着大日子愈来愈迫近，他希望每日可以排舞、练歌、操肌、临瞓前打舖机，最好连访问都唔使做。“当然啦，如果公司话唔得，要keep住曝光，咁咪做啰……我太好人啦。”陈伯之所以想减少曝光，专心排练演唱会，其实系因为佢曾试过状态不佳下练歌，结果搞到声带有事，为免重蹈覆彻，都系小心啲好。

咁演唱会部分又准备成点呢？陈伯好官腔咁表示：“一日未on show一日都系准备中。”他说歌单部分已经准备好，每场多于30首！而两日都会有几首歌系唔同嘅。“因为有啲歌系我好想唱，又有啲歌系大家觉得我一定要唱，自己想creative同有特性一点。可能有个卡拉OK时间会唱晒你哋想听果啲，但点set到同一个tone，呢个仍在研究当中。”除歌单之外，大家最关注的一定系嘉宾环节，陈伯又好官腔咁表示唔会特别公布，但一定有惊喜，他之后更笑笑口话：“未合作过㗎。”两场演唱会门票极为渴市，问到陈伯有无欠下一身“飞债” ，他笑言之前不时有朋友找他落飞，但因为自己大头虾，十次有九次都唔记得“报数俾公司”，结果造成“渴市”状况，所以他在此作出温提：“其实揾陈柏宇系最难买。”

由于拉亲条腰，为免加重伤势，所以呢个访问最后突变为唱K，陈伯原先只系谂住唱少少《尊严》，但结果唱晒全曲，全因呢个唱K apps对陈柏宇靓声似乎有所怀疑，分数一度下滑，反观用怪声唱，分数持续上升，令陈伯最后得到“天籁之音”级别，想睇陈伯唱K，就要睇片啦！

场地提供：King's Fitness