《奖门人》最强“奖金猎人”是谁？　原来洪天明出现次数未算最多

曾志伟一讲“指定动作！多谢！”，相信大家一定会谂起奖门人节目，近日网红King Jer就统计了拎得最多奖金奖品的嘉宾原来是洪天明，上过25次奖门人的他更被冠以“奖金猎人”称号。其实根据非正式统计(应该无计错)，其实洪天明上过32次奖门人，但竟然有一个人比他多上一次奖门人，就是吴家乐，一共有33次！吴家乐接受《香港01》访问时知道后，第一句就话，“下，乜我上得最多咩？唔系洪天明咩！”

提到过往每一集奖门人最后的赢家都会得到奖品非常丰富，有2万件的花之恋寿司及龟苓膏，有好多观众都好想问“2万件寿司应该可以食一世”、“究竟系咪真系有咁多架？”。吴家乐就向我们证实系真嘅，“真系送咁多呀！当然唔系一次过俾2万件寿司喇，一做完节目真系一大叠coupon送俾嘉宾。”他笑言无特别数过究竟有无食晒𠮶2万件寿司同龟苓膏，因为好多时候录完节目后都会同其他嘉宾开心share，“我地大多数都会即晚系化妆间睇下大家想要边啲，分嚟分去，可能我有寿司其他人有龟苓膏，睇下有咩啱用，咁大家起码都有唔同嘅奖品，我都未试过要晒全部嘢。，我印象中有洪天明，刘晓彤，朱咪咪同林敏聪经常交换coupon。”

家乐指因为coupon实在太多，多到好似一本电话簿咁，除了同其他嘉宾分享之外，都会送给节目的工作人员，“都会送返俾帮节目清洁嘅姐姐同化妆间嘅同事，佢地都好辛苦，唔会谂𠮶价值系几多，最紧要大家开心分享下。”节目除了寿司同龟苓膏之外，都会送总值30万元的手袋，究竟点样先可以用得完，家乐就话都系用coupon去换购，“𠮶d真系明码实价去换，可能有人会话系咪真架？真系有咁多嘢，你拎coupon铺头真系可以换返同样价值的手袋。”他表示除非赢到的奖品是大型电器，否则大多数都是即日送出coupon给一众嘉宾，“我印象最深刻赢过嘅奖品系一部50吋的电视机，因为唔系即晚拎走。”

另外有网友亦统计过洪天明，吴家乐以及邓兆尊，几乎每一集奖门人都见到他们的踪影，系节目的常客。吴家乐在访问中就透露是受奖门人曾志伟邀请，“因为本身我地几个大家都系好friend，都系明星足球队嘅成员，平时踢波𠮶阵志伟都觉得我地几个特别玩得，所以希望我地可以上下节目搞下气氛，我同天明都可以话系铁脚。”吴家乐虽然系上得最多奖门人，当被问到有无妒忌过好友洪天明赢咁多奖品，他笑言，“咁又唔会，奖金奖品都系开心嘢，无话一嚟到要就要乜，上咁多集奖门人要嘅系气氛，唔系真系要嚟争嘢抢嘢咁，如果唔系就无个个娱乐性咁丰富。所以我地都不怕地去尽力，去同其他嘉宾玩得咁癫，最重要可以带到𠮶气氛俾观众。”