【反黑】播完大结局24小时内下架　未追晒点算好？

网剧《反黑》成功掀起一股追剧热潮，前后共30集本来喺22号凌晨就会上载大结局，点知喺21号晚11点剧组于FACEBOOK官网出图，表示“《反黑》是日停播”，满心期待担定櫈仔等睇大结局嘅网友们大表不满。其后宣布大结局会改喺10月22号晚8点播出，但播出后24小时即系23号晚上8点，将会全线喺YOUTUBE下架﹗唔系挂，未追晒点算好呀﹗

其后剧组于Facebook上载一段重新配音的短片，讲述当日上载youtube免费播放，希望更多人看到剧组的心血，但他们始终要面对成本压力，宣布10月23日晚上8点，即大结局播出后将与大家暂别。暂别即系咩意思？直至张建声转载留言先知：“第三十集播出后24小时内亦会全缐下架，要计准时间追进度喔﹗”唔系挂，下架﹗30集每集大约一小时，如果未睇嘅朋友呢一刻开始，唔瞓觉唔去洗手间留喺屋企一直睇一直睇，都紧紧赶得切可以煲晒全剧，再迟d就……

暂别留言一出，大多数网友表示理解要顾及成本，即使将来要付费重温，或推出DVD，一套好剧亦绝对愿意支持，不过暂时未见剧组宣布重温方法，亦不满片商太迟宣布下架决定，正在追剧的观众都纷纷留言表示：“唔系挂仲有十几集未睇噃﹗”官方只系话将会喺Youtube下架，大家以为可以到内地官网睇番？记者去到优酷《反黑》网页，的确见到30集齐晒，不过按入去就显示无呢个页面。咁即系……想追嘅朋友趁最后三十小时拿拿声睇啦﹗