【星和无线电视大奖】王浩信蔡思贝隔2个身位　访问完即闪人避嫌

由新加坡的“星和视界（StarHub TV）”和无线电视（TVB）合办的《星和无线电视大奖2017》今晚7点半举行，由上个礼拜开始，网上面已经流出好多疑似得奖名单，大家嘅心水名单都系围绕住王浩信，皆因佢套《不懂撒娇的女人》同《踩过界》红到不得了，呼声相当大，如果今次喺星和先拔头筹拎咗视帝嘅话，相信之后嘅万千星辉颁奖礼都应该拎硬喇，不过唔知最近王浩信同蔡思贝嘅花边新闻会唔会影响浩信拎奖呢？

当地五点半一众艺人就就开始准备行地毯，司仪介绍今年重头剧《踩过界》时，蔡思贝同张振朗一齐走上台，咦，王浩信呢？明明蔡思贝同张振朗先系主角㖞，似乎王浩信为咗避嫌就决定唔一齐出现，之后蔡思贝话：“这部剧到现在为止，是最最最难忘的一部剧，因为还有好的拍档，Ali、Vincent，我们是非常好的一个Team！”

终于后台访问有主持人捞到《踩过界》一众演员，蔡思贝、张振朗、朱千雪、李佳芯同王浩信5个人都系齐到，3位女演员嘅衣著好似约埋咁，同样都系著低胸晚装，相当有睇头！问到王浩信对今次颁奖礼有咩期望，佢就话：“希望个个都可以拎奖，《踩过界》可以攞最佳剧集奖，希望我哋呢度出现到情侣奖，希望我哋呢度囊括到多过5个奖啦！”访问中间明确见浩信与蔡思贝故意保持距离，足足有成2个身位，之后当主持人讲到女演们嘅衣著时，佢仲借啲意闪人，识得避嫌咁咪好啰，唔驶老婆Yoyo（陈自瑶）担心嘛。