【爸爸去哪儿】陈小春一拖五凑细路　锡小泡芙锡出面Jasper都冇份

陈小春喺《爸爸去哪儿》里面是出名嘅恶Daddy，囝囝Jasper成日都被佢闹到晕，就算经妈妈应采儿调教完之后，态度虽然有改善，但做开山鸡哥嘅陈小春好有气场，其他爸爸见到佢都要叫声春哥。陈小春系表面恶啫，其实个心系好锡囝囝，正宗口硬口软，把口就成日呼喝Jasper：“快点快点！”Jasper成日听到都吓到面青青，但有咩事都会第一个冲出嚟帮Jasper。当大家都以为陈小春对Jasper咁恶系因为佢唔识表达爱，咁你就大错特错喇！

陈小春由一节目开始已经大赞第三集刘畊宏个囡小泡芙好可爱，第3集𠮶阵已经开到口话想要好似小泡芙咁样嘅囡，每次陈小春对住小泡芙完全变咗个人，由凶狠恶爸变成温柔暖爸，集集都花式锡小泡芙，完全未见过佢用咁Sweet嘅一面对Jasper。好似今集咁，一班小朋友嘅任务要摘火龙果，戴手套嘅时候嗯哼就叫小春帮佢戴，小春一边帮佢戴一边话佢：“戴手套都不会！”，最尾仲冇理嗯哼戴唔戴到，而小泡芙只系举起咗只手，小春就主动行去帮佢戴手套，真系体贴到不得了。之后小朋友落田摘火龙果，Jasper同嗯哼都向小春求救话个篮太重，但陈小春只系敷衍几句叫佢哋自己拎慢慢行，但相反小泡芙只系讲咗句“好沉”，陈小春即刻话：“我背！”，仲同一对一教学小泡芙点摘火龙果，真系亲生囝Jasper都冇咁好嘅待遇！

大家可以睇吓，陈小春对小泡芙完全系溺宠！