黄致列香港演唱会直播除裤又骚肌 深情献唱云画的月光OST
如果要用一句话概括昨晚韩国歌手黄致列来港举办的第一场香港演唱会，应该要话系一个又好听、又好笑嘅演唱会！黄致列拥有一把沧桑嘅歌声，识别度高之余仲出名唱歌超有感染力，当晚佢一共唱出16首歌曲，包括电视剧《云画的月光》OST《想念想念你》、自己嘅热门曲《每天听的歌》，仲有佢喺《看见你的声音》入面唱过嘅《苦海》等等，令嚟到九展Star Hall睇骚嘅粉丝，真系“耳朵怀孕”咗两个半小时。
摄影：林迅景
黄致列喺8点左右准时开骚，一开始就跳唱出《BangBangBang》，接住就用韩文、国语、广东话向大家打招呼：“大家好，我系黄致列！”曾经参加过大陆节目《我是歌手》嘅佢，全程“国语半、韩文半”咁同大家沟通，黄致列唔单止歌声系“女心狙击”级别，连用国语讲说话都一样咁嘴甜舌滑！佢话：“祝我每天每天都做粉丝梦！我真的喜欢粉丝，我中文愈来愈好，一点点地进步，但我喜欢你们的心，是愈来愈快！快！快！”氹到台下粉丝一片笑声！
记者可以肯定，黄致列真系好重视佢嘅粉丝，因为这晚嘅演唱会上，佢不但大派福利多次落台走入观众堆献唱，又不断将自己抹过汗嘅毛巾、饮过嘅水樽丢下台送粉丝，仲笑话：“来黄致列演唱会可以得到毛巾，你们可以拿回去冲凉。”黄致列仲为粉丝做咗一般韩星都唔会做嘅表演，就系直播后台换歌衫！黄致列竟然俾镜头跟到入后台嘅更衣间，虽然有帷幕隔住，但依然见到佢换衫除裤嘅剪影，成个过程一刀未剪透过大荧幕播出！尖叫吧！黄致列换完衫之后都忍唔住问粉丝：“有啲黄，系咪？”开演唱会开到咁有综艺feel又咁冇底线，难怪粉丝都睇得好开心！
黄致列跟姜丹尼尔@Wanna One B-Boy对决 导致锁骨部位韧带受伤
如果单单呢个环节就已经心跳加速嘅粉丝，接下来嘅表演就更加小心心脏受不了喇！因为黄致列跳唱《Kiss Me》之后，不断“掟”飞吻俾粉丝，甚至扮机关枪发射飞吻！佢仲用国语话：“我真的特别性感！”而稍后黄致列跳唱《Honey》，就证实咗佢真系性感！因为佢唱到一半直接掀起上衣，只著住黑色外套“开中门”跳舞！事后黄致列仲话本来不打算骚肌：“头先我个肚一直用力！我睇到大家嘅眼神叫我脱，我就谂除唔除好呢，最后唔理咁多喇！”佢承诺12月台湾场嘅演唱会上，会练好肌肉再脱过，仲约定粉丝到时要一齐行夜市！最后黄致列同全场粉丝大合照，安哥用国语唱埋王力宏嘅《改变自己》同张学友嘅《一路上有你》，为这晚的演唱会划上完美句号。
我们01韩迷的facebook专页Kpop 01已经开始喇！想知道更多韩国娱乐、饮食、玩乐、时尚资讯，快点去给like吧：https://www.facebook.com/hk01.kpop/