《都市蜜游》郑俊英自爆系花钱狂？ 去旅行一定要带埋“她”！
当韩国oppa遇上“港女”，应该好有火花噃！早前韩国音乐才子郑俊英参演tvN原创旅游节目《都市蜜游》，就揾埋3位香港女神黄心颖、雨侨同倪晨曦拍摄，分别去到伦敦、釜山同四国旅行，刚刚过去嘅星期二，呢位音乐才子就嚟到香港宣传《都市蜜游》，仲抽空同我哋《香港01》做咗个小访问添！
摄影：梁碧玲
讲到同朋友去旅行，最担心嘅事情都莫过于“炒大镬”，大家可能都会有“去完旅行变仇人”嘅经验，不过郑俊英今次就好好彩，今次《都市蜜游》同行嘅3位女星黄心颖、雨侨同倪晨曦，似乎都系完美旅伴！郑俊英大赞呢几趟旅程好新鲜：“喺韩国同韩国演员一齐去旅行嘅节目其实不多，我系第一次同女仔拍呢种节目，而其中更系同香港演员一齐，所以好新鲜亦都好喜欢，3位做我旅伴真系好好，因为佢哋都好听对方意见，亦都好有热情、好有energy，去边个国家都唔会闷！”郑俊英仲话自己拣旅伴嘅条件系：“当然系同女仔去啦！”睇嚟今次黄心颖、雨侨同倪晨曦3位旅伴都完美符合郑俊英嘅条件！
郑俊英出道4周年来香港 《都市蜜游》对黄心颖Elva变playboy？
今次《都市蜜游》游览伦敦、釜山、四国嘅行程中，郑俊英同黄心颖、雨侨同倪晨曦十足甜蜜情侣一样，甚至弹结他对佢哋唱歌，真系好浪漫！不过郑俊英就讲到旅行背后嘅“真相”：“因为系浪漫嘅旅行，明明很热，但就要扮唔热，去日本时嘅天气都系超热！”而且郑俊英喺《都市蜜游》入面要用有限金钱计划行程，真系一啲都唔简单！郑俊英话：“喺有限金钱之下，最难嘅系交通，饮食之类都可以求其解决，但为咗要搭飞机，其他地方都要花费少一啲。”
可能系因为经历咗《都市蜜游》呢3次“有限金钱”嘅旅行，问到郑俊英有冇旅游建议送俾大家时，佢笑住话：“旅游建议？唔系乱花钱就可以喇咩？”经常周游列国嘅佢，又话出门必定要带住一条炼：“去旅行的话可能会唔见嘢，要带一带可以将包包扣喺自己身上嘅炼。”同郑俊英相比，一齐去釜山嘅雨侨嘅旅行装备就讲究得多，好用心经营社交平台嘅雨侨话一定要带相机，仲要唔止一部！雨侨话：“连镜头都可能带好几个，仲有各种唔同嘅拍摄灯，反正日常用品通常喺酒店附近都买得到，基本上行李都尽量简便，腾出空位带拍摄工具。”
其实早前香港歌手周柏豪同韩国女星Clara（李成敏）都已经拍过《都市蜜游》，仲嚟到香港取景添！不过郑俊英同雨侨就不约而同话冇特别参考，因为希望拍出自己style嘅旅程，雨侨仲话：“我出发前主要系搜集釜山嘅资料，当然都希望了解对手郑俊英嘅喜好，好在佢都系歌手出身，用音乐作为共通语言应该冇问题！”难怪两位去釡山拍摄嘅时候咁有火花！
更多郑俊英图片及《都市蜜游》花絮照：
我哋01韩迷嘅facebook专页Kpop 01已经开咗喇！想知道更多韩国娱乐、饮食、玩乐、时尚资讯，快啲去畀like啦：https://www.facebook.com/hk01.kpop/