【任噏乱评】如果你对电视剧有要求　其实《短暂的婚姻 》好啱睇

好多人冇再睇嘅原因，不外乎系觉得大台剧剧情重复之余又稍嫌离地。其实胶剧一样可以好好睇，大家仍然会揾返王晶早年拍嘅笑片出嚟睇。离地亦都冇错㗎，正所谓“青菜萝卜各有所好”，有人睇TVB，有啲人睇美剧英剧，又有啲人睇韩剧，咁其实，大家系咪应该抽时间睇下ViuTV啲制作呢？

例如ViuTV套《短暂的婚姻 》真系剧如其名，“短暂”。全套剧成个故事前前后后加埋都系得5集，每集半粒钟但系个画面好似睇紧电影。故事对白唔似得大台剧咁紧凑，套套都有爆炸枪战，爱情线又好似蜘蛛网咁。先唔详细讲剧情，单系套剧，揾咗歌神陈奕迅同拍《点五步》嘅陈志发导演嚟拍，就已经值得每日花30分钟时间嚟睇。你谂下，Eason对上一套电视剧已经系11年嘅香港电台剧集《狮子山下2006》。请到陈奕迅出山拍剧，剧本点都唔会差得去边挂？至于陈志发，其实佢系一个新(进)导演，佢套《点五步》仲系2016年金像奖最佳电影提名，又系第23届香港电影评论学会大奖嘅推荐电影。

当然，演员导演呢啲嘢之外，剧情对白都系考量之一。《短暂的婚姻 》个剧情就简单啲，讲丧妻嘅男主角（陈奕迅）有一日遇上咗新搬入同一橦大厦人妻女主角（蔡思韵），跟住故事嘅走向，就讲佢哋之间开始由相识到慢慢发展出爱情。由一开始第一集邂逅，到第二集男主角发见咗女主角丈夫有第三者，第三集男主角决定到英国发展，再到第四集男女主角喺英国遇到之后再萌生爱情（第五集结局，估计男女主角唔会有下文）。基本上你可以当佢系一部小品爱情电影一次过睇晒，更加唔会有丝毫大台剧𠮶种拖剧情质关子嘅感觉。

除咗剧情之外，每集对白都会讲一啲婚姻上面嘅道理。例如第四集入面，陈奕迅就用第三身嘅方法讲：“有时有些事情跟过去没关系，而是他怎样选择自己的将来。有些婚姻结束，是因为其中一方离席。有些婚姻结束，是因为二人不再同心。究竟哪种结束是最可怕的？是虽死犹生，还是虽生犹死。”又或者预告入面嘅对白：“真心相爱的人，不能天长地久。胡胡混混，反而容易白头皆老。上天究竟是怎样拿捏因果报应。”就咁睇都感觉到编剧写剧本个位嘅心机，相反大台剧就冇咁著重喺呢一方面。

其实《短暂的婚姻 》入面想同讲嘅信息，系需要慢慢消化。短短地五集，可能仲好睇过长篇大论嘅三五十集。