【反黑】招积复出报复火屎酷刑缝嘴　吴毅将：冇机会爆佢响口！

《反黑》播到呢刻，剧中社团和兴盛可谓搞到四分五裂，黑仔（柯有伦饰）做办事人做唔掂，神爷（陈惠敏饰）又似乎唔想让位，搞到个字头立立乱。不过呢啲都只系过场，真正戏肉今晚先开始。大家仲记唔记得有两位叔父入狱后仲未出返嚟，就系韩彬（吴岱融饰）同火屎哥（吴毅将饰），二人将会联手夹击高调回归嘅招积（张建声饰），腥风血雨不在讲，其中火屎更会因此牺牲，被挖眼缝嘴惨死，招积为乜出手咁重？《香港01》有幸得到江湖猛人火屎哥关照，率先为我哋披露少少结局篇剧情。（小心！内含剧透！）

出狱后逼神爷找数

最近一星期的《反黑》，主力讲和兴盛同洪乐之争，不过好快主线又会返到和兴盛争坐馆一事上，事关彬少同火屎将会今晚（第18集）相继出册。回番少少带，第一集（1986年）讲到彬少同火屎在社团会议上，因藏械同袭警入狱，火屎讲明受完呢10年，出返嚟要畀佢做坐馆作补偿，当时彬少已点醒佢︰“办事人？三五七年后都唔知咩世界啦！”事隔10年，两位终于出狱，并准备揾神爷找数，但老人家似乎真系想赖帐，要起用新人。两个有感被骗，在敌人的敌人就系朋友立场下，韩彬同火屎再不咬弦都一于冰释前嫌，合组新势力去打呢场社团内战！

不过呢场内战其实系三分天下，事关避走一段日子的招积都开心返埋嚟，又系想做坐馆。表面上看似争权，其实当中又夹杂私怨。事关招积当日同韩彬、火屎一齐落网，招积入狱两年间与火屎同仓，火屎话佢好跟唔跟，跟个无间道凤凰仔（陈小春饰）做大佬，于是在狱中糟踬佢，日打夜打之外仲揾人鸡奸佢。这一点正好解释番招仔点解出狱后性情大变，又点解会咁憎凤凰。

吴毅将︰佢要挖我只眼睇清自己！

此外，吴毅将率先为《01娱乐》公开好几张拍《反黑》时的特技化妆相，相中可见将哥被挖眼又缝口，死状甚恐怖，为咩死得咁惨呀？原来都系招积做的好事。吴毅将说︰“剧情讲当我知佢又话要争做坐馆时，于是就揾佢出嚟倾偈，恐吓佢如果再争落去，就会爆佢在狱中被人鸡奸嘅事出嚟，到时睇佢仲有冇面做坐馆？”

点知呢句说话触痛到招积神经，不单落手要佢命，仲要挖眼兼缝实佢把嘴。吴毅将说︰“呢两点都有意思，缝实我个口代表我呢世都再冇机会爆佢响口，冇人再知佢被鸡奸嘅事，至于挖眼就系我临死时，佢挖我只眼出嚟，要我睇清楚自己而家有几折堕。”提及特技化妆，将哥非常满意，化完都忍唔住不停Selfie。“化咗两个钟左右，台前幕后都好有心机，好逼真呀！”不少网民第一集见到火屎哥出场都好兴奋，奈何之后就迟迟未见人，今次又同大家披露啲死人照，会唔会代表佢一出狱，就被人埋单先？“唔会，我总共拍咗8集戏，所以出狱后都仲有7集睇，慢慢睇！”将哥得知大家喜欢火屎呢个角色，都好开心。“多谢大家支持，我都希望将来有机会，拍多啲香港剧集俾大家睇。”