杨怡罗仲谦结婚一周年　公然打情骂俏网上放闪

结婚唔系一段感情嘅大结局，而系人生新阶段嘅开始，两个人依旧要努力去维系感情，才可以细水长流。罗仲谦同杨怡结婚以来，除咗去度蜜月一直聚少离多，谦谦忙住扮沙僧拍西游记，杨怡亦连接两套舞台剧到处巡回演出。10月2日系罗先生罗太结婚一周年纪念，终于夹啱时间去旅行，仲喺IG微博放闪又不时开LIVE，但系点解多咗3位电灯胆呢？

杨怡喺微博上载一张同谦谦嘅合照，相片中谦谦用强而有力嘅臂弯抱实老婆仔，两个人情深对望眼中只剩下对方。阿怡仲留下一段Caption：“Our first wedding anniversary.Thanks for being in my life. （我们首个结婚周年纪念，感激你在我生命中出现。）”谦谦亦马上转载兼留言话：“一年后的今日，老婆！多谢你！爱你！愿你一世平安快乐！”真系睇到都sweet到起晒鸡皮呀。

不过呢次旅程就唔单止得罗先生罗太，杨怡开直播时，见到同台仲有周丽淇、郭晋安以及袁伟豪，于布拉格街头齐齐叹紧咖啡，成班人喺度话自己唔识开live嗌晒救命咁。翻查各人嘅社交网站，Niki有上载一张喺机场嘅合照，即系5个人一齐搭飞机到当地，而唔系咁啱撞到啦，佢仲加上Hashtag #五星旅行团，莫非好似胡说八道会咁样拍个新嘅旅游节目？据知杨怡应该系同周丽淇、郭晋安以及袁伟豪到当地拍摄新剧《再创世纪》，原来谦谦系趁假期做跟得人夫陪老婆开工，顺道庆祝结婚周年先至真。