十一国庆塞车被困17个小时　张继聪苦中作乐：有时间可以思考人生

十一国庆系中国好重要嘅节日，除咗因为庆祝国家成立之外，仲因为香港有得放假一天，大陆就更夸足足放成个礼拜，咁多日假个个都趁机出外旅行走返转，所以有黄金周之称。年年十一全国景点都逼到水泄不通，唔好话睇唔到靓风景，就连行都行唔到，就算连万里长城都企满人，认真夸张！今年亦都唔例外，广东省各高速公路由寻晚开始全部都大塞车，交通陷入瘫痪状态。

近年唔少艺人都北上揾银，好似张继聪咁就真系黑仔，佢撞正国庆要返大陆拍剧，本身已经好醒目咁提早出发，但世事点会咁易被你估到，就算凌晨十二点出发都系遇到大塞车，本来车程就3个钟，司机都系打算delay多3个钟，大概朝早六点就会到。点知等吓又等，阿聪足足被困喺车成十二个钟都只系行咗三分一嘅路程，粉丝都好担心佢点样解决佢嘅“生理问题”，塞成十几个钟车，附近都冇厕所，就连老婆谢安琪亦忍唔住心痛留言：“辛苦你了！”虽然北上揾银多，但真系全部都系辛苦钱嚟。

3个钟又3个钟，张继聪终于用咗接近17个钟由香港去佛山，再加2个钟车程先去到酒店，听到都戥佢辛苦，估唔到阿聪都仲识得讲笑话：“以后遇到啲咩困难，我唔会再惊，因为塞车塞十几个钟都试过，仲有咩要惊！”张继聪一到酒店，冲个凉就要开工喇，佢就话好多谢大家沿路在社交平台为佢打气支持，仲好正能量咁话：“其实塞十几个钟车都几好呀，抛开世俗嘅烦嚣，欣赏沿途嘅风景，仲可以欣赏得好仔细，因为个风景唔会郁。”大把时间可以思考人生。