【TVB Secrets】无线助导超辛苦　冇得冲凉瞓觉兼被人用粗口闹

在无线工作辛苦、人工少已不是秘密，但要数最辛苦的工作，非剧集组助理编导莫属，这个被称为P.A （Production Assistant），美其名副导演，实则和打杂没有分别，阿杰（化名）为现职无线剧集组导演，在这行十几年，当助导５年后升做导演，亲证过最黑暗时期，他说：“呢份可能系全球最辛苦的工作，千禧年入行，人工7500，同期大学生多我5嚿水，而家新仔好似有13000至15000，大学生就一定啦，我试过3日3夜冇冲凉、冇瞓觉，坐车途中瞓得就瞓。当然唔使拍剧，做后期就舒服啲，但剪片间房好冻，因为啲冷气唔系俾你用，系俾机器，冻到你唔信。”

应该有不少人说过无线P.A工作是阿四、阿杂，但这个打杂真的很能干，阿杰说：“譬如要拍一场4个女演员喺沙滩打排球嘅戏，首先你要睇呢4个女仔个期得唔得，会唔会有人同A.A（统筹）mark咗期出去做嘢唔得呢？或者佢同隔篱剧撞咗时间？搞掂人之后，咁场沙滩戏喺边度拍？清水湾二滩？石澳？荃湾？平日定假日？之后佢哋著咩衫，又要落张服装单，咁就要望下个剧本，有冇指定边个著三点式，定系主角要保守啲呢？咁件衫你又要望下，因为一阵服装阿姐执咗件阿婆泳衣，主角话唔著㖞，咁你又要同班女主角讲，边日拍泳衣，叫佢哋醒目，到排球喇，要落张道具单book，记住有book唔一定有，但冇book就一定冇，仲有个网，同埋气揼，真系会俾个冇气嘅排球你㗎，又要问下导演使唔使book老临？如果要，又要揾老临公司，当你万事俱备，到现场你就要招呼导演，但而家我讲紧一场戏，你一日出外景差唔多拍4至5场戏，你要重复以上嘅嘢，其实好易出错，出错后果点？咪俾老板闹啰，老板就系导演。”

P.A工作繁多，有关于拍摄的，都是他的工作范围，工作量高，不是最大问题，最大问题是压力，因为你要招呼每一个部门，每一个部门都可以闹你，阿杰说：“导演、统筹，同组P.A、演员、化妆、道具、服装、老临、机器组、剪片、制作联络等....我都未数晒，全部一朝早打一个电话俾你，你都冇得瞓啦，仲要喺你出外拍紧嘢，俾导演用粗口问候紧嘅时候，几十个部门都打俾你，问你嘢，而佢哋亦有权闹你，你话压力有几大？我试过做P.A，book漏咗个连戏电话，俾导演当住50几人面前，用粗口问候老母，见到你喊，冇用㗎！仲问你：‘喊乜X嘢！而家有话错你咩？你咁X蠢，唔好做啦！”P.A俾导演用粗口闹喺电视城日日发生㗎，演员都见怪不怪，其实你听惯咗，你会当粗口系一个好普通嘅助语词，句句有自己阿妈系正常嘅，哈哈。”

人工低、地位低，压力大，还要被人问候娘亲，那为何有人会入职呢？原来全因追梦，阿杰说：“因为你好想做导演，拍自己嘅嘢，以前拍片唔系而家一个手机就得，阿猪阿狗都话自己系导演，如果你想做杜琪峰、想拍Drama，你唯一途经系TVB，除非你入到电影圈啦，但冇人脉冇家底，你好难入到电影圈，更加唔好话做导演啦，所以就算咁辛苦，都有好多想做导演嘅人入行，虽然流失都好多，因为真系好辛苦，但咁辛苦，TVB剧集组导演系值钱嘅，你就算而家上大陆，你话你自己边套剧导演，待遇都唔同，因为由P.A升到导演，一啲都唔容易，做足4至5年嘅P.A，古装、时装、民初，你都熟晒，冇乜出错，你嘅组织力，沟通能力应该唔错，应该冇乜工难到你。”