【爸爸去哪儿】陈小春原来系个女儿控　踎低畀小泡芙淋水都唔嬲

大陆综艺节目《爸爸去哪儿》嚟到第五季，大家最关注嘅肯定系陈小春呢对父子，睇住囝囝Jasper畀陈小春闹到晕，个个都睇到好肉赤。小春份人冇耐性又脾气差，几次闹Jasper大声到连路人都吓亲，可能大家都以为小春似系个严父，对小朋友恶啲啫，好彩Jasper由细到大都被妈妈应采儿调教得好，所以面对住小春的呼呼喝喝，佢都游刃有余，仲可以淡定叫爸爸“Stop angrying”，真系要畀个叻佢！

但睇到第3集，惊觉小春竟然系个“女儿控”，前两集佢已经不停赞刘畊宏个囡小泡芙好可爱，仲话好想生个好似小泡芙咁可爱嘅囡，见到小春望住小泡芙个样，冧到佢！今集玩游戏𠮶阵，就要求各个小朋友喺爸爸身上喷一喷水，小春一见到小泡芙行过嚟，已经主动踎底准备等佢，点知小泡芙在佢背脊乱咁倒水，小春不但止冇嬲冇发脾气，个样仲好冧咁话：“谢谢，好舒服！”平日小春对住Jasper从未见过咁冧嘅样，笑得非常灿烂，网民个个都话希望山鸡哥快啲生返个囡，等个囡去治愈吓佢！可惜啊，之前传媒曾经问过丁丁（应采儿），问佢有冇谂过生多个囡，佢就Say no咁话：“但是如果女儿长得像爸爸的话，就不是说特别好，所以我觉得生两个儿子会比较保险。”小春如果想追多个囡嘅话，睇嚟要同老婆大人沟通一下。

但小泡芙又真系几得意嘅！