碧咸变身执波球僮　哈七首次上足球班尽显老豆遗传

遗传基因系非常奇妙嘅一样嘢，父母比较高大仔女普遍都唔会矮，父母艺术感强仔女都好少会毫无美学眼光。万人迷碧咸同Victoria结婚18年诞下三子一女，个个都得天独厚系靓仔靓女，原来佢地更尽得“黄金右脚”真传，脚法非常了得﹗

碧咸上载两条短片到IG，片段中见到佢带住现年6岁，身穿oversize白色球衣嘅囡囡Harper Seven到足球场，写上“Someone’s ready for her first football lesson(某人人准备好上她的首次足球班。)”话就话系第一次，但Harper Seven功架十足，拖住爸爸只手父女互传控球，另一条片就由碧咸抛波俾个女踢，估唔到Harper Seven可以百发百中，仲大脚踢到个波飞走咗，果然尽得爸爸真传。虽然堂堂万人迷变左执波球僮，但睇佢嘅笑容就明白不知几咁享受啦。

所谓𡥧女拉心肝，Harper Seven自小就万千宠爱在一身，有妈妈帮佢扮靓，三个哥哥锡到佢㶶，加上生得非常可爱，细细个去球场支持爸爸，一举一动都足以抢尽风头，而且佢似足爸爸运动细胞非常强，曾经被影到踩滑板同一身滑雪装备现身。宜家连踢波都咁利害，唔知会唔会引来球会注意，争住签呢位明日之星呢？