【爸爸去哪儿】陈小春被应采儿闹　山鸡收晒火：你是大哥我是小弟

今集《爸爸去哪儿5》讲到Jasper病咗都要上节目，因为病到入医院，所以系下半部份陈小春两父子先至出现，但佢哋依旧仲系焦点所在。前2集大家都好留意陈小春发脾气呼喂阿囝，今集陈小春就嚟个180度大改变，成集几乎未见过陈小春发老脾，全程都系好好态度，到夜晚食饭𠮶阵仲主动叫Jasper食饭先，佢笑笑口咁话：“你是大哥，我是小弟，你先吃。”Jasper听到都吓到呆一呆，明明平时畀人闹到晕，突然间就变大哥，山鸡哥做咩有咁大嘅转变？原来上集老婆应采儿见到阿囝咁惨，返到屋企就好好教训咗陈小春一餐，佢复述道：“上集给我老婆看到，她说你不要这样子对儿子，别人看到不好看的嘛！”山鸡哥全世界最怕的人竟然不是浩南哥，而是老婆丁丁。

你睇Jasper冧到......

陈小春嘅脾气完全畀丁丁清晒咁滞，记得上次因为Jasper著袜踩落地，畀小春闹佢Dirty，今集真系风水轮流转，小朋友Jasper依旧整到脚仔污糟，唔同嘅系小春亲自烧柴煲水帮囝囝洗脚，原来今次系Jasper出世咁耐小春第一次帮囝囝洗脚，Jasper舒服成个人飘飘然，又大赞小春：“爸爸好舒服，你怎么弄的？”，小春即刻扮型话求其整嘅，成个画面相当温馨！

其实咁样咪好啰，一对父子就应该系咁样相亲相爱，事后小春提起帮Jasper洗脚呢件事，讲到眼湿湿：“就算以后爸爸老了不能走路了，你不帮我洗，但那天晚上我帮他洗脚的那一刻，我永远会记得。”