童星Jacky仔长大了　为学业淡出幕前：最记得刘德华同我玩

讲起“Jacky仔”呢𠮶名，相信你脑海会谂起佢拥有一副劲得意圆碌碌嘅样子，其实佢今年已经19岁喇。Jacky仔今日出席活动时，少了当年趣致模样，换来的是乖仔斯文look出现。读紧城市大学媒体与传播系嘅佢，依然好热爱演戏，虽然近年传媒寒冬，但Jacky仔𠮶团火依然无熄，“希望毕业之后可以从事返传媒行业，我真系好有兴趣！” 听完都觉得好有heart！

2003年当年只有4岁嘅Jacky仔就参加了由港台举办嘅节目《点虫虫 开开心心学飞》而入行，“𠮶阵哥哥系主持仔之一，当年制作组就去我地屋企做访问，见到我都几得意，所以就开始拍下港台同教育电视嘅节目。”适逢当年沙士袭港，佢就与黄秋生合作拍摄《1: 99 抗炎短片 - 我的飞行家族》而开始为人熟悉，“拍摄完短片后，𠮶阵负责拍短片嘅导演张坚庭先生就叫我家人不如试下寄信去TVB俾我做童星，好快TVB就有回复，开始拍剧。”Jacky仔指TVB都好好，好肯迁就佢返学时间，“𠮶阵我读上午校，一放学就去拍，都无乜冲突。同埋佢地都唔会俾一啲好难嘅角色我做，都几开心。”

提到拍过咁多套剧集，边位演员令佢最深刻印象？Jacky仔谂咗一阵就答，“系欧阳震华，2007年同佢拍《爸爸闭翳》，做佢个仔。真系隔一两日就见一次，佢成日都同我玩，有时又会教下我。另外仲有刘德华，当年拍《童梦奇缘》我做佢年轻版嘅弟弟，虽然同佢无戏份，但佢都有嚟探我地，又会关心我读书呀，又会同我玩。”

小时候可以同咁多巨星合作，真系唔系每位童星都会有嘅经历。2009年，Jacky仔因为准备升中学开始淡出幕前，突然之间无咗童星嘅光环，会否有点失落？他就话，“我觉得心态要转变嘅，始终童星长大后就会比较少啲机会拍摄，咁我都觉得学业要紧，始终唔可以忽略。咁而家入咗大学，有机会同时间咪接返，其实做童星对我嚟讲系一个几有趣嘅经验。”

Jacky仔表示身边有好多同学都知自己就系当年嘅“Jacky仔”，仲话同学有时都会同佢开玩笑，“因为上年新闻都有报道过，咁咪知道我系读传理，其实佢地都系睇住我大。佢地而家有时系地铁站都会见到我细𠮶拍嘅广告照，都会同我开玩笑话：‘𠮶个系咪你呀？’我会话系呀，张相系小时候拍嘅，都无乜话好特别，都系当我普通同学。”有边个大学生唔想GPA坐3望4，原来Jacky仔读书都好劲，“今年有3.6，以呢𠮶成绩希望下年Year3 可以到美国或者英国做exchange，学多啲嘢！”咁勤力读书咁感情生活点先？估唔到对镜头完全唔怯场的他，竟然会在识女仔方面被考到，Jacky仔就好怕丑咁话，“无呀而家依然系单身，都系想先专注学业。（咁钟意咩类型女仔？）性格同价值观相近，年纪都大细都唔系问题。”