FB信息随时跌入黑洞　倪晨曦黄建东踩中陷阱

香港地做生意，好多人唔一定有官方网站，却需要一个Facebook专页，香港700几万人口，每月活跃用户超过500万，好多人惯性有咩查询都会inbox提问，但原来有个致命陷阱，令专页有机会错失大量客户查询！艺人倪晨曦同黄建东都深受其害：“足足miss咗几百个信息呀！”

最近有网友意外发现，部分用户传送之信息，会被Facebook过滤至“其他”的分类，情况就如电邮中之杂件箱。但“其他”分类收件匣，看似贴心地为大家过滤邮件，但最大陷阱是，此分类未能于网页版或Facebook官方apps中显示，只能用手机网页浏览器查看。唔少FB PAGE管理员大吐苦水，话这个陷阱好可能隐藏不少客户查询，实在损失惨重。

原来唔少艺人一样因此而蒙受损失，甚至被误会拣job耍大牌，黄建东就系其中之一：“之前二创片段喺网上热播之后，发现原来好多客户都会利用FB inbox揾我，包括周年晚宴EMCEE工作、一啲广告拍摄，仲有表演嘉宾等等，我头先见到miss咗一堆MSGS，有D喺半年前传过嚟，我都有即刻覆返唔好意思而家先见到个信息，但客户好多都已经揾咗其他人做，仲话以为我对个job无兴趣所以唔覆。对我嚟讲接唔接到呢个job唔系最大问题，而系唔想俾D客觉得我好大牌，好似唔稀罕呢个工作，绝对唔系咁架，我对大大小小嘅工作都非常着紧，保守估计都损失咗五位数字，自己会check番多D密D，希望唔会再有呢D问题发生。”

选美出身的倪晨曦（Elva），身兼演员、模特儿、节目主持及瑜伽导师多职，更被网友封为“IG女神”，原来佢都误堕呢次嘅陷阱：“大约有200至300个信息跌咗入呢个收件箱，中间大概一半系有关工作查询，好在大部分有转用电邮或其他渠道联络同事，损失未算太大，而家希望尽快回复返呢D讯息，亦都希望唔好咁多同类事情发生。”

到底点样可以查询到呢D跌入二次元空间嘅信息呢？大家必须要用“手机”嘅Safari或Chrome浏览器，输入自己Facebook Page网址，选择活动>讯息>收件匣，左上角位置会有一个选项，拣番“其他”先会睇到被隐藏嘅信息。叶翠翠根据呢个方法check咗，只得几个失踪信息，可谓不幸中之大幸。