【壹号皇庭】欧阳震华为悭钱　自爆瞓无线厕所：冻咪缩只手入衫

最近有唔少深夜煲剧迷每晚12点，都会乖乖坐定定留在家中重温返25年前嘅热播剧集《壹号皇庭II》，除了睇剧情之外，当然系睇一众巨星未红时嘅演出。而昨晚(24日)由芷珊姐姐主持嘅《最佳拍档》，就邀请了欧阳震华(Bobby)，陶大宇及苏永康做嘉宾，大谈拍摄经过之余仲分享未红嘅经历。Bobby就话入行几年依然做紧“2-7线”嘅演员，即系咩角色都可以做，期间更试过有PA揾佢做嫖客，被对方嘲讽：“啱你啦，有女揽！”

Bobby近年都被外界称为TVB“收视福将”，因为佢一有新剧出街收视必定高，原来当年Bobby都曾为自己嘅前途担心过，甚至想过转行。Bobby透露年轻时家住西环为了悭时间悭车钱，有段日子都在当时还在广播道作总部的TVB里的洗手间度过，“瞓过无数咁多晚，木人巷啲金属椅好冻，就匿去洗手间啲椅瞓。如果冻，咪缩住手系T-shirt入面，咁就瞓咗好多晚。”

幸好，当时遇到邓特希监制的剧集《壹号皇庭》开拍，才令Bobby真正变一线小生，“因为全部演员无一个系一线，全部都系二线头，二线尾，我地一直都好浮浮沉沉。即系如果你揾刘德华做，就会全部戏份都落系佢度，呢𠮶就系邓特希唔想嘅。”Bobby透露《壹号皇庭》去到第三辑就开始飞纸仔，“全部结案陈词都系飞纸仔，拎埋嚟系热架。”他其后表示拍摄第一辑时仍然会背剧本，但到第三辑Bobby就开始唔睇住剧本读，“𠮶阵我同佢（邓特希）讲，我识d律师结案陈词边会记得咁多嘢，全部都系写低之后读，不如道具手足帮我整个架，估唔到佢（邓特希）真系信我！”唔知观众又睇唔睇得出呢？