新一辑《美女厨房》重现Big Big Channel　经典主持粥粉面饭无影

一讲“美女厨房，食咗先讲”相信大家都一定会谂起2006年由郑中基，梁汉文同方力申主持嘅综艺节目《美女厨房》，最近TVB又再喺Big Big Channel将节目复活，但节目主持就换上6号陆浩明。BTW今次《美女厨房》实在冇得同旧版比，因为昨晚第一集嘅评判就请嚟张振朗同一位厨师以及两位参加过《我系小厨神》嘅小朋友做评判嘉宾，评论当然无以前咁好笑同毒舌，仲要无四位女助手粥、粉、面、饭，咁究竟仲系唔系《美女厨房》呢？

记翻起当年嘅《美女厨房》真系集集都被一班主持人同嘉宾笑到气咳，节目中仲会分“美女厨神”同“地狱厨神”，节目最后一辑《天堂地狱争霸战》仲系当年游戏节目收视之冠，因为有270万观众，对而家嚟讲，简直系天文数字！讲番昨晚播出嘅新版第一集，就请嚟蔡思贝同谭凯琪（Zoie）做嘉宾，食材仲要有八爪鱼，但二人煮起嘢上嚟冇话好腾鸡，都几淡定，但节目最吊诡嘅系评判只系俾分蔡思贝，而谭凯琪煮嘅虽然被一班评判弹，去到节目做完更加系冇俾到分，相信睇live嘅观众都唔知发生咩事。我哋亦有问返谭凯琪昨晚最后系点？佢就表示自己系地狱厨神︰“平时都有煮嘢食，昨晚嘅菜式味道不差，如果到时嫁唔出去要揾BigBigChannel 负责！”

其实近日Big Big Channel都好似有铺“复活”瘾，日前TVB助理总经理余咏珊亦证实，之后会将被禁播11年嘅综艺节目《囍趣台》安排下星期播放，究竟TVB几时先会再有一个全新节目，真系要拭目而待一下！