【多图】杜汶泽新助理神似薛凯琪：只系心胸广阔程度唔同

讲起杜汶泽，好自然就会谂起《空手道》，讲到《空手道》呢套未上映但系已经拍完嘅电影，又会谂起以前“刀仔锯大树”𠮶套《低俗喜剧》。我都明白，电影同现实“睇落相似”，实质其实就“相差甚远”。套戏话监制同只驴“风雨交加”过，唔通现实中又发生过咩 (p.s. 如有雷同纯属巧合)。再者，唔通套戏入面杜汶泽有个“做嘢俹簁”嘅秘书，唔通现实中又真系有咩...咪住先，真系有㖞。

近日杜汶泽更加喺facebook上post咗呢张相，仲写埋“原来世界上所有 intern 都系同一个造型，不过只系心胸广阔程度唔同。”真系激到图中右边个假intern薛凯琪入去留言还击“加上我那时候只是演intern 而已，不是真的。还有我看不出来广阔程度有什么不同？！？？哪里哪里哪里x6”咳，样貌身材就不便评论 ，不过网民留言似乎都一面倒认为2张相嘅相似程度只限于衣著...

而呢一位靓女新助理就名叫杨浩儿，杜汶泽就叫佢“九妹”或者“狗妹”。九妹更加因为热爱足球队曼联的关系，英文名仲改做Manchester 。根据Instagram显示Manchester系中文大学新闻系毕业，之后仲喺香港机场做过地勤。杜汶泽讲起请佢嘅原因，就话：“主要系针对年青人市场，所以想请成班后生仔女返到嚟公司。系嘛，大家打成一遍咁样，高啲士气，所以我哋公司冇大有细嘅。唔好话佢，我都要负责执头执尾。请到佢返嚟，就希望男同事可以多啲活力咁样。荷尔蒙标升，又令到创意标升咁样。”系吖，办公室有个靓女系唔同啲。不过，宜家阿泽间新公司个办公室得佢同新助理2个人。唔知阿田又会唔会呷醋呢?

话说杜汶泽近来就积极搞新公司做网媒，原来背后原因都系源自于佢对上一个主持嘅节目。杜汶泽接受《香港01》访问时说：“咁就要多谢奇妙电视，因为上次喺佢度做咗个《杜汶泽食住上》反应好好，但系大部份人都喺网上睇。作为表演艺人，除咗收人工片酬之外，就梗系想多啲人睇啦，于是乎我就谂到做网媒。网媒个名就叫做‘HAHAHA’。初部构思就系做一个live-talk show，访问明星嘉宾或者素人。”

关于呢点，杜汶泽就解释说：“人哋寄信嚟应征，跟住嚟到见工。你话人哋样靓身材好唔请人，你即系歧视人哋啫。个胸大冇罪㗎，人哋都系嚟打工啫。杨浩儿，即系九妹，本身就读新闻系嘅，佢除咗要帮我扫地洗衫抹台之外呢，仲要去揾一啲新闻题材返嚟，等我可以访问一啲人同做专题探访咁样。佢真系一手包办㗎，又要资料搜集又要抹地。新人最紧要抵得谂，佢就满足晒我要求啦。”不过照咁睇杨浩儿都唔似《低俗喜剧》入面个秘书“做嘢俹簁”嘅，杜汶泽仲似乎好满意佢添。