【壹号皇庭第二辑】长发王菲饰检控官现身　24年前仲系叫王靖雯

TVB深宵剧场播紧嘅《壹号皇庭》，第一辑13集话咁快已经大结局，一众剧迷晚晚边追边大呼过瘾，紧接20号晚就会播《壹号皇庭II》，最受注目嘅当然系1993年仲用紧王靖雯呢个名参演嘅王菲啦。

“今天且忍心笑笑干杯，可知一天我会荡回，你纵会说已早改变，独自梦下去都不悔”呢首《执迷不悔》虽然已经系24年前嘅作品，但宜家听番依旧动人。王菲当年仲用紧艺名王靖雯喺圈中打滚，呢只歌成为《壹号皇庭II》插曲唱到街知巷闻。当时仍然留有长发嘅王菲亦粉墨登场，饰演新进检控官唐毓文（Mandy)，戴住假发于庭上振振有词，无论是气质上还是演技上，都堪称一流，完全无新人嘅稚嫩感，不比女主角陈秀雯逊色。

王菲出道以嚟拍过四套电视剧，有三套都系TVB嘅剧集，第一套拍嘅系1993年嘅《原振侠》，王菲饰演一个精明能干的女特工，COOL COOL地面上唔会有太多情感；另一套系近年劲HIT嘅穿越剧《千岁情人》，王菲喺里面饰演秦朝一名舞姫叫胭脂，拥有不死之身，千年容貌都未曾老过，二千年后遇上方中信饰演一对，喺古代嘅另一半系洪朝丰，亦系王菲喺TVB拍嘅最后一套电视剧，其后要到2001年，先至再参演嘅日剧《弄假成真》。

宜家想再睇到王菲拍剧，机会率应该接近零，菲迷不停煲完又煲呢几套戏，惊觉偶像演嘅角色都系个性鲜明，无论系COOL COOL地嘅女特工、喺庭上言词锋利嘅检控官、还是拥有不死身嘅绝色舞姬，无论点睇都系演紧自己，非常王菲Style。