【嫁到这世界边端】独家访问港女泰妻Judy：完全感受到他对我嘅爱

早两晚无线播出的《嫁到这世界边端》泰国篇入面，港女Judy嫁到泰国同泰仔老公Dass定居曼谷生活的爱情故事，感动到好多观众同网民之余，亦令大家对这段港泰恋充满好奇，想再知多啲。香港01记者就独家访问了身在泰国的Judy，记得节目话过Judy对老公系一见钟情，相信唔少人都好想知道究竟她点解会对老公一见钟情，老实讲Dass又唔系靓仔。Judy就解释返其实唔算一见钟情，反而是因为她自己自作多情才令这段恋爱萌芽。

Judy讲返当时的情况都忍唔住笑：“第一次认识Dass时觉得他这个人几过瘾，之后返到香港见他成日都喺msn online等我，其实他只不过是在打机所以有online，我就自作多情以为人哋特登online等我。我们keep住在msn倾偈倾了一个月，觉得大家好啱倾，又睇得明大家的英文，他会好用心听我讲嘢，我愈来愈钟意他，于是就趁我们都就快生日过泰国揾他。”Judy话无谂过如果求爱失败会点：“我觉得一定得，无谂咁多。点知原来之后讲返，先知原来Dass那时对我系无feel嘅，完全系零，他从未拍过拖，唔知道钟意一个人系咩感觉。那次之后我返到香港，跟他视象他竟然喊了出来，话好挂住我，话从未试过有呢种感觉，𠮶一刻我就知道我成功咗喇。”

作为一个港女，要同个泰仔拍拖仲话要嫁埋过去，唔通Judy嘅家人无反对过？Judy话：“又无话反对，不过都会好担心，我爹地会问我究竟Dass信唔信得过㗎，妈咪又会问我嫁去泰国其实开唔开心，到结咗婚都会继续问。我梗系有带Dass返香港见我父母，成日见㗎，他们对Dass的印象都ok呀，会觉得他是个细路仔，我的朋友都好钟意他。我自己都无谂过他这个泰仔会呃我，我妈咪仲话系我欺负他。”

好喇，来到唔少人都好好奇的一个问题，到底Judy觉得泰仔同港男有咩唔同呢？Judy话：“泰仔比较有耐性些，Dass真系好有耐性，会好用心听我讲嘢，我有时唔理他照在他面前讲广东话，他也会用心去听，仲学埋广东话添。他肯耐心等我过来曼谷探他，唔系他也不会甘愿等我，早就出咗去识第二个啦。同埋Dass从来唔闹我，无大脾气，唔似得我以前啲香港男朋友咁会闹会对我发脾气。”

原来喺Judy眼中嘅Dass既唔浪漫亦唔系好细心，喺翟道翟咁热，Dass都唔会帮Judy抹下汗，Judy笑言：“我帮他抹汗就有。”但这些Judy都不会介意，而且仲好明白同体谅老公：“他内心是对我好的，我知道。其实我们的相处好生活化，两个人朝夕相对，他好难去制造啲咩惊喜，不过我完全可以感受得到他对我的爱，有这个老公我真系几生修到。”哗，系爱呀哈利！Judy话老公有时会突然锡她一啖，都好sweet㗎，讲起老公锡锡，Judy记得Dass曾经呃过她：“我们初初拍拖时他绝对不会在街上锡我，呃我话泰国人一定唔可以喺公众地方锡㗎，他惊畀认识嘅人见到，想我哋感情稳定些先。”

Judy同Dass拍拖时经常都会飞过曼谷探男友，基本上一有假就会去，后来仲辞埋香港份工，喺当地一留就留三个月，边拍拖边帮Dass手打理翟道翟的精品店生意，当时两人已在商量怎样扩展共业务，认定了对方做另一半。两人由01年认识到拍拖到03年结婚，咁Dass系点样向Judy求婚㗎呢？Judy表示：“无求婚㗎，唔浪漫㗎，系大家有共识，都觉得唔会系第二个㗎喇，Dass又戥我辛苦，唔想我成日香港泰国两边飞，想我安顿落嚟跟他在曼谷生活。Dass令我好有安全感。”嗱，相信唔少港女都唔钟意甚至会唔畀个男朋友或者老公打机，但Judy就好赞成老公打机：“他钟意留在家里打机几好吖，痴家嘛，我宁愿他做宅男打机，都好过他钟意出去蒲出去饮嘢。”港女们学嘢喇，宅男其实系笋盘嚟㗎。

可能会有人觉得Judy同老公一个月净系开舖几日，赚𠮶万零两万蚊港币，好唔够，可以搏命啲赚多啲，Judy却对现在的生活感到满足和幸福：“我们两个都唔系好发钱狂嘅人，所以可能咁样会活得开心啲，有时会觉得够喇咁咪算啰，够交铺租咪算啰。咁系人都想要多钱啲钱嘅，但我哋𠮶种生活钟意比较悠闲啲。在于我而言幸福真系一定唔系用钱嚟衡量，唔系嘅话我就唔会嫁到嚟泰国。两个人幸福一定要互相好深入咁了解大家心入面好深层嘅嘢，如果对方都唔明白自己何来幸福？如果大家都唔明白大家已经系好唔幸福既事。同埋大家双方对于对方为彼此做嘅嘢会记喺心度，会心存感激。”而Judy和Dass亦正正就是这样。