【九州攻略】杜如风出海遇上数十条海豚：好想跳落海同佢地游水

热爱一个地方，可以去到几尽？杜如风（Helen）单系日本各地区，已经拍咗超过80集旅游节目，嚟紧10月又有新节目《九州攻略》，被封日本通绝对实至名归。Helen自细揭日本明星杂志，即使到加拿大升学，之后更拎埋奖学金到日本读书。以为当时日文已经同当地人无异？Helen接受香港01访问时苦笑话：“去到日本先知自己日文唔得，要打三份part time学会话！”

杜如风当年去到加拿大升学，双主修都拣读城市规划及日本研究。毕业后考到每年每个国家只派出5个学位嘅日本文部省（教育局）奖学金，入读位于东京嘅顶级学府──国立御茶之水女子大学。Helen接受香港01访问时话，去到先有意料之外嘅事发生：“读书时拎奖学金去到东京，点知到咗日本惊觉落街买嘢都唔知点沟通，而拎到呢个奖学金去到当地嘅，全部来自世界各地好似联合国一样，喺学校完全学唔到日文会话。当时自己心谂，识写唔够，要快啲识同人沟通先得，学校又学唔到日常用语，点算好呢？”

由于爸爸杜惠东专门写日本艺能界新闻，Helen都喺佢薰陶下爱上日本文化，遇到呢个困境，第一时间亦都系打俾爸爸求救：“我问爸爸应该点算好，佢话咁啱有朋友喺领事馆林立嘅西麻布区开法国私房菜，叫我去𠮶度捧餐做侍应，餐厅好细得10张台。”喺餐厅要面对面同客人沟通，Helen另外仲有两份兼职：“当时我同时打三份part time，其实都无咩返学，哈哈！”

Helen由读书至工作，去日本应该过百次，估唔到呢次拍摄嚟紧10月播出嘅《九州攻略》时，仲可以令佢有意外惊喜：“当时知道要搭4个钟车程，去一个叫天草嘅地方拍摄，来回8个钟㖞，真系好想打退堂鼓，点知成为最深刻嘅一part。我地坐船出海，周围有成20、30条海豚围住只船！几想即刻跳落海同佢地游水呀，最衰无带泳衣咋﹗”佢话天草呢个地方，船家对海豚习性非常熟识，“完全知道边个时辰方位会出没，几乎100%睇得到！”

嚟紧Helen又会带住超级豪华团游日本，要面对团友唔同要求其实压力都唔细，到底带团辛苦啲定拍节目辛苦啲？“两者比较的话，一定系拍节目压力大过带团，因为要赶item赶日光拍嘢，同埋一点，日本人好准时，有阵时拍摄会有delay，点几钟仲拍紧A店，但B店又约咗2点，𠮶时真系会好头晕。”几乎每次出trip拍摄，Helen都一定病倒入院，不下数次喺荧幕前见到佢吊住盐水，一样夹住米高峰继续讲讲讲：“今次系唯一一次唔使入院，次次都中招，韩国𠮶次最严重，直情好似断咗片一样；而杭州嘅医院就最靓最好，叫齐中西医一齐嚟睇我，五星级照顾，睇嚟之后可以考虑拍辑医院攻略啦我。”