【任噏乱评】内部订票睇陈奕迅好稳阵？　帮人订飞随时冇朋友做

“Eason麦花臣，唔好问我，无计。”“杨千嬅年尾拉阔？咁少位唔受订票呀，自己去换啦。”最近于Facebook见过唔少Pr及唱片公司人员，纷纷出po戴头盔，落闸唔帮朋友订演唱会门票。唔系有好路数都唔帮朋友仔，逼大家帮衬黄牛(千其唔好，犯法㗎﹗)，不过大家又有无谂过行内人之苦呢？

近年睇亲演唱会，公开发售时唔少FANS抱怨“又系绝望座位表”，即系大部分门票已被主办商扣起，座位表显示呢啲内部订票嘅位置会变成黑色，公开发售时就只见漆黑一片得两三成座位可以买，仲要面对有组织排队人士，一人买十张廿张，轮到自己埋柜位时，咩靓位都无晒啦。

咁圈中人又系咪一定订到飞呢？又未必㖞。内部订票其实包括信用卡优先订票、赞助商hold起一定数量送俾客户、表演嘅艺人又话亲友想订一千几百张、仲要hold起门票俾啲艺人呀、名人呀到场欣赏，仲有啲位俾传媒去采访，净返嘅先轮到所谓圈中人落单订票。

无论做记者定宣传、经理人定文员，只要你入咗行，一有天王天后开骚，廿年前嘅同学都会忽然跳出嚟，嘘寒问暖一番再叫你帮手订飞，见过同事落飞数量高达五六百张，仲要有指定睇边场几多钱，十张连位分开坐唔要。喂呀，你估我做通利咩，要边场有边场，拎番几百张飞番黎仲要逐个分好俾唔同人，做“分飞燕”好好玩呀﹗搞成日都未分完㗎，仲要约出嚟交收，真系时间车钱都蚀埋。

更过份嘅系，要内部订票通常主办方为求保障，会要求先入钱hold位，有时朋友讲明会睇但唔得闲入钱，要代为垫支俾主办方，点知俾晒钱先话“当日原来唔得闲唔要啦”“啲位麻麻地咋噃，都系唔去啦。”唔去唔紧要，仲要唔俾钱唔拎飞，搞到代订嘅要自行散飞，实在系可怒也﹗呢啲唔系个别例子，身边朋友就遇过十几次，大拿拿垫左五位数出嚟，每次喺Facebook见到佢地放飞嘅po都会留言提醒：“以后真系唔好再帮人代出钱啦。”

五月天、陈奕迅、郑秀文等红星开骚，真系开多廿场啲飞都会俾人抢清光，当内部订票爆晒唔够分时，要cut飞就紧系由低层cut起㗎啦，唔通cut某某传媒嘅总编咩﹗笔者就亲身经历过呢件事啦。尚记得几年前苏打绿于红馆开演唱会，本来唱片公司话可以入订金落order Hold门票，笔者就帮朋友落左二十张左右，点知过左两星期主办方打嚟话唔够分，cut飞cut净六张并即时退返钱。由于笔者其实系无份睇嘅，只好将实况转告朋友，点知就换黎朋友抱怨俾左钱都无得睇，搞得颇为不愉快，自始以后都唯有加入落闸行列啦。想睇嘅朋友，早啲起身上网又好排队又好，靠自己买飞啦。