【港姐2017】泳衣出场睇真啲　 5号雷庄𠒇最淡定

嚟到泳衣问答环节，今次由网民经过Big Big Channel发问问题。

着惯泳衣嘅５号雷庄𠒇（Juliette）表现得最有自信，但系由于中文水准麻麻，喺答问环节就爆出好多笑话。

网民问佢如果叻哥陈百祥系佢亲生爸爸，点说服叻哥认番佢？Juliette用唔咸唔淡广东话答：“介绍自己，识佢少少先。”又话：“想知佢状态系点。”森美即笑佢：“做你老豆要知状态系点？”叻哥忍唔住帮口：“答得好答到佢哋唔明，得我明。”跟住Juliette又指想知道叻哥嘅性格同人碞，如果系好人至会承认佢呢段关系，全场大笑。

６号邱晴被问到如果宣萱同DoDo姐一齐跌落水佢会救边个？邱晴原来唔识游水，但佢竟然答：“我会跳落去同佢哋一齐浸死，因为想同佢哋去第二个地方生活落去。”吓到DoDo姐抢住讲：“我救你我救你。”森美最抵死：“最惊宣萱同DoDo姐上天堂得你落地狱啫！”