【灿烂的外母】推剧陪老婆生B　张颖康成好老公典范

新剧《灿烂的外母》七月煞科八月极速播出，一改无线近年拍剧慢慢排队出街作风，令大家都不禁想睇睇呢套剧有咩咁特别。刚刚播出两三集，除薛家燕、黎诺懿、姚子羚、林嘉华外，仲有一位值得留意嘅演员，饰演豆品厂太子爷嘅张颖康。十月中将再为人父，接受《香港01》访问时张颖康透露：“本身有套剧9月开，但老婆就生我想陪佢多啲，只好讲句唔好意思。”

张颖康喺《2016年万千星辉颁奖典礼》夺得“飞跃进步男艺员”后，今年产量反而好似少咗，暂时只得《与谍同谋》以及《灿烂的外母》两套播出街，亦都Keep住徘徊二三线，未上到第一男主角之位：“唔会话拎奖后期望上位做男一，睇番呢几年得奖者就知无呢回事啦，公司见你ok咪奖励下你啰，无话一定捧你架。如果系𠮶啲心态，会心谂俾完奖我做乜唔捧我，咁下年解得约啦﹗唔会有呢啲谂法架啦，做好自己就得。”

其实呢个访问系张颖康喺台湾拍摄时，打长途电话返香港做嘅，返香港第二日又要开工，真系JOB接JOB无停过：“剧其实我keep住一直拍，早几个月《天命》要剃头，紧接就拍《灿烂的外母》，产量其实真系无少到。不过点解大家觉得我少咗开工呢，系因为《天命》hold起咗我个期6个月，咁中间就接唔到啦。”

嚟紧11月张颖康先再入剧组，中间嘅时间可以陪下囡囡，同埋张罗一下第二个BB出世嘅嘢：“其实本身中间有个剧想我接9月开拍，两套剧叠住拍，体力上我应付到，不过因为老婆10月中生BB，经过上一胎本身好乐天嘅老婆产后情绪上唔多妥，今次我真系想陪佢多啲。只好同监制讲声唔好意思接唔到。”

提起家人，听把声都感受到张颖康系个好老公好爸爸，佢同老婆麦雅致共同用一个Facebook Page，不时上载一家人嘅合照，提起囡囡小豆仲眉飞色舞：“由《东坡家事》播出，小豆一岁几已经知爸爸系做戏，之前睇电视见到爸爸锡第二个女仔，个女会即刻锡番妈咪，好搅笑，好似怕妈妈唔开心咁。老婆同我讲寻晚有场戏我去大排档食饭，个女又会问点解爸爸出街食饭，但睇完又同我facetime，搅到佢有啲混乱咁，所以成日讲俾佢听爸爸拍戏唔系真，不过太细个啦未知发生咩事”

张家好快就会由三口子变一家四口，广告都有话养大一个小朋友要近500万，不过张颖康就话财政上无太大压力：“多个人多双筷啫，我嘅人生目标其中一样，就系想一家有四口，完成埋呢次就ok啦。(会唔会希望好似黎诺懿咁，做咗爸爸之后接多啲广告?)都唔关事嘅，唔想因为小朋友出嚟多工作，作为演员做好啲戏就得，戏外就做好个爸爸，唔会去谂生个女好旺自己锡佢多啲，咁如果生多个行衰运，唔通怨小朋友黑住自己咩？”