【周街访．有片】婚礼人情有公价　十优麦明诗出手系咪阔绰啲？

撰文： 洪晓璇
出版：更新：

去六星级酒店婚宴，人情起码2000蚊？今个月收到4封“红色炸弹”，睇嚟要餐餐带饭啦﹗

双春兼润月，即年头和年尾有两个“立春”，被指特别适合嫁娶，“红色炸弹”接踵而来。每次收到喜帖都会满心欢喜戥好友高兴，但同时亦为封人情而烦恼。唔止系你同我，呢个烦恼艺人们一样有，呢次访问网罗明星同素人，睇下大家觉得宜家到底“人情何价”？

调查显示，酒楼摆酒的人情“公价”已加至800元。(资料图片)

刚投身社会嘅港姐冠军Crystal冯盈盈，宜家先得23岁，身边朋友成家立室请饮经验唔算多，Crystal话都系今年先开始收到喜帖，仲要系男友嘅朋友，搅到佢都急急忙忙上网Check下现在人情公价系几多，得出嘅结论系酒楼八百，酒店千二，好朋友千四五左右，佢都不禁话：“咁啱旺季一个月去一单，计落其实都真系几贵，仲要唔系我嘅朋友，不过话系我男友好朋友，都会去祝福下。”

冯盈盈唔算去得多婚宴，都觉得人情有点贵。
分期付款呢个谂法系几乐观嘅。

另一位港姐冠军麦明诗就话会跟场地级数俾人情：“顶级嘅酒店大约千五到千八，普通酒店千二，酒楼就大约一千。” 去下一单去下又一单，收多几张帖其实使费都几大噃：“当然唔算好平，不过调转谂，其实都系帮自己婚礼埋紧单啫，好似分期付款咁，宜家俾完到时自己结婚人地咪俾番我啰﹗”咦，又好似几有道理。

Bob话即场拆人情系无发生过架﹗

经常担任婚礼司仪嘅Bob林盛斌，话晒入行多年又系老板级，人情几乎都系二千蚊起跳，五千甚至一万都试过，担任婚宴MC多年，佢好肯定讲一句：“即场拆人情喺现实生活中系唔会发生㗎﹗自己从未见过，系詹瑞文拍戏先有啫﹗”至于麦美恩就话：“四位数啦﹗(范围好阔㖞﹗)咁又真系有朋友收过我一千蚊人情呀吗﹗(识唔识㗎？姓咩？)Em……识㗎，哎呀唔好讲啦佢应该唔记得㗎啦﹗哈哈哈﹗”

到底边位圈中人收过Mayanne嘅$1000人情呢？

如果收到帖最终又无去，传统上都会托朋友放低份“心意”，Bob就话少少地都俾一千，不过冯盈盈听完停左一秒，再O咀表示：“吓，乜要咁㗎，我唔知呀﹗”喺加拿大土生土长嘅Mayanne都话唔知要俾：“鬼妹无呢啲嘢噃，哈哈哈，都有三个Best Friends今年结婚，三个我都无俾人情，哈哈哈，唔会俾人闹㗎可。”所谓不知者不罪，唔会有人怪你地嘅。

冯盈盈听到唔去饮都要俾人情，吓到O咀。
台湾美眉听到香港人情公价，不禁话：“(台湾腔)好贵哦﹗”

艺人都参考网上“人情公价”，市民又如何呢？街访中大部分市民俾人情都系俾800至1000，主要睇场地及交情。当中刚好有位台湾美眉，原来当地人情预算大约$1200，不过系新台币﹗同香港也差太远了吧，美眉听到香港嘅人情公价都不禁话：“(台湾腔)好贵哦﹗”

俾30蚊人情，系英勇嘅……

香港宜家有各式各样婚宴场地，想细搅同朋友开派对，有网友提议到麦当劳开派对，睇番官网的确有婚礼套餐，最平$2999有交易﹗市民听到去麦当劳参加婚礼都觉得好有趣，不过人情方面都会略为调整下，呢位先生话谂住俾30蚊，唔知系入纸币定买礼卷呢？

$2999麦当劳宴客，你又会唔会考虑？
黄先生何小姐话会好好KEEP住个一蚊留念。

不过30蚊都未系极致，早前外国有一对情侣，白撞闯入陌生人婚宴，留低一蚊人情，当时对新人就话好惊喜仲想约佢地食餐饭做朋友，如果呢件事发生喺香港，好在嘅遇著黄先生何小姐，佢地话：“有一蚊都好过一蚊都无呀，将来对方结婚一蚊兑换做两个五毫，祝佢地成双成对。”如果遇上吴先生麦小姐就无咁好彩啦：“白撞紧系赶佢出去啦，兄弟拎报纸﹗”奉劝大家，呢啲玩笑真系唔好随便开啦

如果白撞去吴先生麦小姐婚宴，会被兄弟团报纸侍候。