【天鸽风球】睇片真系好惊 岑咏辰：朋友屋企道墙出现裂痕﹗
撰文： 洪晓璇
出版：更新：
相隔五年香港再次挂起十号风球，呢只天鸽嘅威力真系非常强劲，澳门全市大停电，香港各处亦出现惊险场面，棚架倒塌、低洼地区水浸、更有吊船被吹至吊吊揈击爆住宅窗户。大部分人都留在安全地方暂避，不过留于家中一样感受到台风威力。原名岑洁仪的岑咏辰于IG上载短片，可以见到围栏及盆栽被吹倒，Zoey接受香港01访问时话：“风力真系好夸张，朋友屋企道墙仲出现裂痕﹗”
Zoey上载一条于家中拍摄嘅短片，风声大得吓人，留言话：“真的要纪录一下十号风球的天鸽，真的好恐怖，把我家室外的物品全摧毁，我还感到整栋楼在摇动.....太夸张了，大家出外要小心，尽量不要出外吧”其后佢接受香港01访问：“屋企喺将军澳区，可能东面比较当风，全晚都听到好嘈嘅风雨声，仲FEEL到屋企摇摇下，囝囝都吓到喊左好耐呀。今朝见到露台吹到满目疮痍，可以拎入室内嘅都尽量拎晒，不过出面有个篷吹到冧左，好得人惊。”
FACEBOOK、WHATSAPP Group疯传各区喺风灾下嘅情况，Zoey都话睇到心惊胆跳：“睇到𠮶条吊船撞爆窗嘅片真系好夸张，好在家人同朋友大部分都无事，不过有朋友屋企道墙出现裂痕﹗佢仲话唔知留喺屋企定应该离开先啱。”
除左岑洁仪之外，关心妍亦有上载短片，话感受到屋企好似正在摇晃，而陈炜就上载一张相，相片中有两个盆栽疑似被吹倒，并留言话“10号风球下的一天，瞓住觉等落波，再等通知几点返工”。