巴士阿叔哼歌少年播歌互嘈　吴业坤：佢咁做EQ唔够

巴士不但是公共交通工具，还可以看尽人生百态，让座给长者小童大肚婆固然是美德，但遇上更多的是让人讨厌又火滚的行为，直头当正是自己屋企，想做就去做。好似几个人明明相识一起上车，却偏偏要分开坐，隔住几个座位倾偈，声浪大到吓亲人。也有人在巴士上食捞面、食寿司，令全车充斥食物气味，仿如变了美食餐车。至于剪指甲、搣脚皮这些行为，更是令人相当恶心，以上种种听落好过分，但又确是大家也有机会遇上，只能叹句“唔好彩啰”，有乘客选择死忍，亦有人绝地反击，以牙还牙。

近日网上流传一段巴士短片，有位阿叔在车上哼歌，仿如玩紧“超级无敌估歌仔”，唱得相当投入，旁若无人。坐在他身后的巴打忍无可忍，取出手机开大喇叭，用周柏豪的一首《我不要被你记住》反击，咁都未算，更将手机放在哼歌阿叔的耳边，并拍片放上网。不过其他网民似乎不大支持巴打播歌反击，纷纷留言“播歌咪一样影响到人”、“以牙还牙呢个世界好唔安宁”、“五十步笑百步”。其后该位巴打表示对方未有退缩，还越唱越大声，只是他之后到站落车，未有下集结局可以睇到。

作为音乐人的吴业坤，灵感到时亦有哼歌的习惯，他接受《香港01》访问，“睇下当时感觉啦，我都会哼歌嘅，如果系公众场所咪会细声啲啰，有时在Coffee Shop谂到都会哼，然后录低啰。其实都唔怕骚扰到人，同平时讲嘢差唔多啫。(当时那位巴士阿叔在车上哼歌？)公共空间同交通工具都应该有适当嘅音量嘅，唔好话唱歌，倾偈都会细声啲啦，总之细细声唔好骚扰到人，共用紧个空间架嘛。”

对于该名巴打用手机播歌反击，坤哥就绝对不赞成，“咁样反击人嘅话，𠮶个人唔够EQ啰。(遇上这种情况应该如何处理？)应该用言语相劝，大家都系文明人。”坤哥虽然是艺人，但若然不太赶时间，他也会搭巴士，生活其实相当贴地，但说到在车上见到的讨厌行径，“自己好少遇到，有时都会见到啲人坐到伸埋脚去对面位啰。”

至于另一位音乐人陈康健，他表示识他的人都知他爱周围唱歌，“真系会哼出嚟，记得有次坐的士，司机问我系咪玩音乐嘅，仲估我系歌手，佢话我上车之后就开始哼歌，当时我仲反问有哼歌咩？有啲拍子喺心里面，不其然出咗嚟自己都唔知。(对于网民播歌反击哼歌阿叔？)咁佢就衰啲。老实讲我哼歌俾人话就未试过，我相信𠮶个人哼歌可能系无心嘅，虽然影响到人都唔系咁好，但开喇叭𠮶位就唔止影响，佢直头唔理成车人感受㖞。”问到他在巴士遇上的讨厌经历，他表示“我都少搭巴士嘅，就算搭都会避咗人多嘅时间，塞车、环境好局就会觉得好辛苦，因为自己身体唔系咁好。讲返转头，香港人又系唔钟意开声嘅，开咗声可能无事㖞，咁嘅天气，36.8度又系热到令人好躁嘅。”陈康健就讲中Point啦，大家讲清讲楚，总好过用极端手段报复啦。