【《捍卫者联盟》剧评】四大英雄剧情考记性　温馨提示翻睇夜魔侠

MARVEL迷近排最期待剧集《Defenders》(捍卫者联盟)已经有得睇，呢部集结4大英雄Daredevil（夜魔侠）、Jessica Jones、Luke Cage同埋Iron Fist（铁拳侠）嘅美剧究竟有冇令人失望呢？

如果你冇睇过以上4个英雄各自嘅剧集嘅话，建议你煲一煲《Daredevil》首两季同埋《Iron Fist》先，因为《Defenders》嘅主轴事件系同《Iron Fist》有关。

《Defenders》首集所有主角都已出场，但因为要交代各自嘅延续故事而4人又未碰面，剧情就显得有点一嚿嚿，有啲松散。而且伏线太多，睇过晒所有series嘅观众都要啲时间load一load，例如铁拳侠一开头追捕紧嘅系乜嘢人？Daredevil同女朋友嘅关系之前系点？Luke Cage点解喺监狱？jessica Jones怀疑已死嘅大敌人翻生等等，喺第一集一次过搬晒出嚟真系少啲记忆力都唔掂！

帮《捍卫者联盟》拍宣传片的黄秋生就唔见，但系大奸角薛歌妮韦花就已现身，佢饰演嘅“The Hand”（手和会）首领系首次出现，一定要讲嘅系薛歌妮韦花非常压场，每句对白都有摄人魅力，一定要留意！另外动作场面系令人睇之前最担心嘅，事关睇过《Iron Fist》嘅朋友都知道，拳拳无力、画面一闪过就瞓低晒嘅所谓打斗系几咁难顶，比起《Daredevil》差几皮，而《Defenders》就比《Iron Fist》好，武打设计介乎两套剧之间，希望夜魔侠快啲着番套紧身衣表演下啦！

而过往4套剧集嘅氛围都好唔同，《Daredevil》、《Jessica Jones》比较深沉，《Luke Cage》正气，《Iron Fist》较轻松，《Defenders》要喺中间取得平衡系比较困难，笔者就觉得偏向深沉与正气之间，相信随住剧情发展会更加深沉。

暂时嚟讲《Defenders》首集剧情较为平淡唔算好精彩，只系完场前一场突如其来嘅大地震似乎唤醒咗几位主角嘅危机感，意识到大事即将发生，同时提醒咗观众追下一集，作为观众当然好期待4个主角集结啦，同埋打大波士薛歌妮韦花有几劲啦！仍然好值得期待嘅！