无线小花林伊丽4个月3度入院：医生话要即刻做手术

4个月入3次急症？曾经拍摄《三日两夜》，有“翻版张钧宁”之称的无线娱乐新闻台主播Michelle林伊丽，3月同圈外金融才俊拉埋天窗成为幸福人妻，怎知原来这4个月以来都受病痛折磨，Michelle在16号Facebook留言透露已经第3次入院，更加要即刻做手术。她接受《香港01》访问时表示：“医生话唔太正常，要即刻做手术。”

Michelle 16号早上于Facebook留言“The Third Time....Can it be the Last Time。（第３次了，可以是最后一次吗）”上载两张瞓喺病床状甚痛苦嘅相，右手插针疑似吊盐水，几小时后更表示要准备做手术，手术后Michelle接受《香港01》访问，透露病情：“从今年4月开始，经常半夜胃痛痛醒要入急症打止痛针，有照过胃镜又无特别问题，只知系急性胃炎。啱啱星期二（15号）晚收工返到屋企，突然个胃又痛得好紧要，即刻要再入急症，医生话我实在痛得太多次，而且太频密唔多正常，帮我check晒全个腹腔，先至发现原来系盲肠炎，要即刻切除，凌晨入院，同日下昼即刻入手术室切除盲肠。”

盲肠炎虽然好普遍，但唔尽快处理好易引起并发症，Michelle都话无谂过咁大件事：“其实真系好痛，不过一直以为只系个胃嘅问题，做完手术医生话要瞓多两晚观察怕有并发症，如果无咩大问题就可以出院。（做手术怕不怕留有疤痕以后著比坚尼唔靓？）今次做微创手术，医生都话揾啲可以遮到嘅地方落刀，希望唔影响工作啦。”Michelle指手上剧集已经拍摄完毕，工作上暂时未受影响。

其实Michelle今年刚刚成为人妻，3月喺峇里举行婚礼，7月再喺香港补摆婚宴，老公见到身边人病咗一定好心痛，她说：“几次痛到入急症，老公有一直陪住喺身边，寻日做手术佢都一直喺度支持，呢排辛苦佢啦﹗”