37岁司徒瑞祈开舖卖小食　离巢重新开始：好想踏出呢一步　

人称阿水嘅司徒瑞祈2012年由演员转型做儿童节目主持，虽然今年4月佢就同无线讲再见，休息几个月后，即系今日（16日）他正式荣升做老板，系慈云山开小食店“阿水厨房”。见佢系舖头亲力亲为，37岁的司徒瑞祈都好有感触咁话，“成唔成功未知，最紧要开心。人生好短，赚几多钱都无用，做人简单啲就会开心同幸福。”

2004年以青春爱情剧《赤沙印记＠四叶草2》出道嘅司徒瑞祈，2012年就被TVB调到儿童节目做主持，而家回忆起当时嘅情景都好享受，仲话唔觉辛苦，“其实TVB嘅辛苦反而系一开始拍剧要日夜颠倒，做儿童节目就无辛苦嘢，辛苦咪记稿，但做耐咗成班人都好开心，反而日夜颠倒对我真系辛苦。”阿水笑言因为自己生活好规律，“我好早就瞓，所以早睡早起对我无难度，现在日日都系咁。（有无唔舍得？）唔舍得只不过系解散咗儿童组。”咁有无谂过如果续约TVB会有咩新发展？阿水就表示自己都有考虑呢个问题，“可能都系做青年人节目，我会谂再老多几年，可能做《都市闲情》，但又觉得公司未必会咁样帮你安排。”他指自从无得做儿童节目之后就当系一份工咁打，“但我好想踏出呢一步，真系想实现梦想开阿水厨房， 所以续约嘅时候令到自己向前睇，睇下自己梦想系咩，如果继续签落去，唔知几时先会跨出嚟。”

阿水指选择不继续与TVB签约要用好大勇气，“去年7月我知道公司好快揾我倾约，我同自己讲今年一定唔签。其实两年前都有想讲话唔签，但最后被动摇都系签返。但今年就同自己讲，唔签唔签唔签，一定要自己创业创梦，当时身边好多朋友都叫我记得唔好返去。”咁其实以前系TVB嘅人工系咪太低先选择不续约？他就表示人工一向唔差,“只不过我觉得系继续做落去，做唔到自己想做嘅嘢，同埋最开心嘅时间都过了，咁我不如自己揾一啲更加开心嘅嘢，因为我觉得工作最重要开心。”

阿水最后都重申自己无离开到电视圈，“有啱嘅咪做，最近都有为ViuTV拍节目，自己都钟意吹水，有机会咪做主持人，唔系完全脱离演艺圈。”佢仲话自己嘅座右铭就系简单就会快乐，快乐就会幸福，希望大家都揾到自己嘅梦想！