【有片】薛家燕十字步后再跳舞　玩拉丁Salsa：最紧要系拧条腰！

“唏呀唏呀唏呀唏呀唏”，系好多人眼中嘅“有声post”，个脑亦会浮现薛家燕笑到四万咁口嘅样。家燕姐自剧集《真情》由“好姨”呢个角色开始复出幕前，再加埋电影《食神》中大嗌“叉烧呀﹗好叉烧呀”嘅味公主，呢二十年来一直以开心果形象示人。当然不得不提，大家都想同家燕姐疯狂跳嘅十字步啦﹗不过嚟紧要学新嘢啦，家燕姐喺新剧《灿烂的外母》挑战拉丁Salsa，Are You Ready？

今年五月开拍七月拍完，八月就话播出街嘅新剧《灿烂的外母》，最近密锣紧鼓开始宣传攻势。“See See TVB”facebook官方专页上载咗一条短片，艺人麦凯程（Alex）去咗探《灿烂的外母》班，身穿桃红舞衣戴上眼镜嘅家燕姐坐喺餐台前密密补妆，见到有小鲜肉拎埋一堆零食探班，表现得心花怒放。

提起外母唔少人即刻会谂起卢苑茵，第一次见女儿男友就关心对方住边区有无楼嘅势利外母。呢次家燕姐喺戏中饰演黎诺懿外母，当中亦有唔少大斗法情节。家燕姐显得好深感受：“出年我就做人奶奶(儿子结婚，奶奶同外母嘅身份好似差唔多，所以我喺戏入面学左好多，特别系拍摄我女儿结婚的一场戏，当时觉得好感人，点知前夫突然出现，搞到我不禁谂，我真人娶新抱𠮶日，我前夫会唔会突然出现呢？”