气质女神李靖筠杀入无线　捞晒三个免费电视台　

曾几何时，想加入娱乐圈，电视箱系入屋嘅好选择，参加选美、艺训班、各类电视台搅嘅比赛，无论有奖无奖，都系入行嘅捷径。不过香港比较特别，艺人唔似台湾内地咁个个频道都去得，签左约通常只会喺一间电视台亮相。时至今日，香港嘅免费电视台增至三间，面对ViuTV、奇纱电视挑战，TVB亦不再死守只捧自己人嘅策略，揾黎唔少外援，如陈滢经理人约不在TVB一样剧接剧，新一位会唔会系喺ViuTV曾经拍剧担正嘅李靖筠Gladys？

近几年网络力量愈趋举足轻重，唔再系公司捧边个就红边个，唔得网民欢心，有时甚至系捧边个死边个……从一D票选女神结果可见，唔再清一色靓女、清纯、性感得天下，真性情如鲁芬、夏蕙BB，又或者文青FEEL一样得民心。ViuTV开台后拍剧量唔多但口碑不俗，当中《三一如三》女主角袁澧林被捧为文青女神，同剧另一位女角李靖筠Gladys，都系来自MODEL界，短发硬朗FEEL原来一样好有市场。估唔到Gladys居然已经签约TVB。

2014年仲读紧中大嘅Gladys，已经入行兼职做model，其中最为人熟悉嘅，系参演许志安歌曲《流泪行胜利道》MV，仲有幸福止痛素广告主角，于viu TV处境剧《三一如三》，饰演温碧霞女儿，凭住短发爽朗形象，加上于剧中不时自弹自唱令人气急升。

Gladys宜家签埋TVB部头合约，之后应该不时有机会见到佢嘅身影。不过网友都好好奇，形象较男仔头嘅Gladys喺大台适合做边类型角色，有人话Gladys感觉同蔡思贝有d似，做两姐妹可能有得谂噃﹗

不过Gladys其实仲有个威水位，就系今年佢接拍奇妙电视剧集《热恋100天》担任女主角，同林耀声有感情线。系少数做匀三个香港免费电视台嘅艺人。比较好奇，迟下奇妙电视套剧出街，Gladys帮唔帮到手做宣传呢？