《东张》利颖怡被王晶拣中　新剧有份拍：有发挥背部全裸都得﹗

由王晶监制嘅《赌城群英会》刚刚落幕，大家印象最深刻会系边一个角色？赢比赛输人生嘅OK仔马国明？忆夫成狂处女拍剧嘅若兰麦明诗？最多网友谈论嘅应该系中段已经离世，以神级内心戏演活欲哭无泪嘅叻哥陈百祥。之前传出《赌城群英会》开拍续集，由叻哥揹重飞，剧情入面仲会一人分饰两角，做孖生兄弟同自己斗戏，《东张西望》主持利颖怡(Joan)上载一张新剧通告，证实晶哥将开拍《大千世界》。说时迟那时快大家好快又有机会欣赏叻哥演技﹗

于《东张西望》担任外景主持，穿着小背心报道抢包山，激凸身材被网友注目嘅利颖怡Joan，上载一张新剧通告，“你已被委派演出《大千世界(暂名) 》剧集……该剧集监制王晶先生将于短期内与你联络”，证实晶哥将再帮TVB开剧。Joan表示：“(有传呢套系《赌城群英会》续集？)其实我暂时都未知套剧讲d咩，早两日艺员科Whatsapp呢封信俾我，之前都从来未试过，寻日有打去艺员科问自己系做咩角色，但佢地都话唔清楚要再通知。”

Joan指已经好一段日子无入剧组，之前于《深宫计》中学到好多，一边担任主持一边等待下一个机会：“呢份系今年最好嘅生日礼物﹗自己都有睇《赌城群英会》，估唔到有机会参演晶哥作品。(网友估你有可能系下一个晶女郎﹗)唔敢当呀﹗有份参演我已经好开心，都要喺度多谢网友支持，张图我只系贴左24小时张时动态，无谂过会被cap去讨论区。(晶哥作品嘅女角好多时要性感演出。)如果角色需要，戏份有发挥嘅自己唔会介意。上年帮《东张西望》拍左个feature要著比坚尼，出街后都多左人话我性感，今年刻意减少著比坚尼，不过如果为拍戏自己绝对无问题﹗(性感底线？)只要有发挥，背部全裸都无问题，唔露股就可以啦﹗”

好多人以为Joan系TVB第26期艺员训练班入行，但其实再之前佢已经客串过《爱回家》。“加拿大读完书返香港，有两个目标，做公关或演员。当时做紧公关工作，因缘际会做临时演员，可能幕后见我有热诚，介绍我入TVB，第一套拍摄嘅就系《爱回家》。导演以为系训练班出身，鼓励我去考艺员训练班。2年几前有机会入《东张西望》，本身口才好差，唔同访问中学到好多野。”

做到固定主持班底有稳定曝光率，同时亦因为档期被锁死少左拍剧机会，不过Joan就话感激每个机会：“2年几前入《东张西望》，本身口才好差，唔同访问中学到好多野。宜家出街都有人认得系“东张个主持”，希望好快会有戏剧上嘅代表作，如果喺街有人叫角色名会更满足﹗”Joan透露早前拍摄一套电影担任女一，同王耀煌、梁证嘉、赵硕之等合作得非常愉快，年尾有机会上映，希望大家睇到佢嘅努力。