前财经主播林芷彤突破20秒读130字　流住嘻哈血：我钟意听农夫

“以上嘉宾系金管局同证监会嘅持牌人，以上谈及嘅结构性产品并无抵押品…”呢段130字难读过急口令嘅免责声明，系两年前，前TVB财经记者林芷彤喺《创富坊》讲得栩栩如生。只需15秒，一秒9只字，真心同欧美Rap God Eminem有得Battle下。事隔两年，林芷彤唔再系财经记者，但系佢再重现20秒爆seed读财经资讯，仲有同拍档一齐紧贴《中国有嘻哈》的节奏，一齐Rap出新世界，两人唔系普通数白榄咁简单，有埋flow、tempo，仲有ryhme！

记者就问过林芷彤，佢而家开咗个page叫“坚林芷彤”，听落都觉得贴地，同佢以前系TVB报新闻嘅形象完全唔同。最近佢就加入咗“耀才财经台”做主播，今次重操故业Rap财经，佢话冇所谓嘅豁唔豁出去：“今次其实都当系一个marketing campaign 咁做，有d人可能会觉得财经新闻好闷，所以先想用呢个方法，向大家发放最新嘅股市资讯，我都会继续正正经经报财经㗎！”有唔少网民见到林芷彤出山，都好期待佢会一直Rap落去，但Rapper 芷彤就话：“好多人都问我系咪会keep住rap，其实我都惊大家嫌我成日rap好烦！”反应咁好，又点会烦呢？

据知林芷彤最新作品，系佢同同事一齐Jam出嚟：“日日完晒节目就几个主播同幕后同事以及分析员开会，睇下条桥应该点。（好多人话你有Rap嘅天份㖞！）我唔敢讲自己rap得有天份呀，实俾人派嬲呀。但我系钟意听农夫d歌嘅！”林芷彤笑言自己刚刚转工，连试用都未过，今次要Rap住讲财经，都有啲压力：“老实讲，上次条片爆左我都好surprise，因为其实好多同事都有呢个技能。因为完全无心理准备，条片咁爆我一开头系惊嘅，因为惊影响个客，所以初头系完全抗拒睇d remix片同comment，个排训都训唔好，好大压力。但件事过左之后，就开始睇返啲片，其实有啲都几搞笑！”

林芷彤仲预告自己都会读免责声明：“响创富坊时快读disclaimer系因为节目时间所限，要好快读晒段disclaimer然后去广告，否则会令之后既节目延误。之后我都会做窝轮节目...一定会再听到我读disclaimer嘅！不过呢度无time limit...所以唔好expect我会读得好快…”至于离开TVB之后，林芷彤都仲有同TVB同事联络，仲会得闲打下机食下饭，最近就打Mario㖭！