拍完《同盟》就收山？　鲍起静：年纪都大，唔可以拍太多

去年由文伟鸿监制的无线剧集《城寨英雄》叫好叫坐，相隔一年，他以《同盟》再度出击，剧中一班演员包括陈展鹏、鲍起静及陈山聪等演员下午出席宣传活动。相信观众一见到陈展鹏同鲍姐不期然会谂起“亚视”，鲍姐就笑言，“完全唔会有亚视feel！”

鲍姐透露在亚视嘅时候，曾与陈展鹏合作饰演母子，今次在TVB首部剧集又系做母子，“前后啱啱10年，又再重逢。佢真系成熟咗好多，叻咗好多。”提到今次剧集都以动作戏为主，今年已经68岁的鲍姐都避免唔到，相当吃力，“要走嚟走去，又踎底起身，都几大运动量。而且我以前好惊要揸枪，因为好重。但今次拍之前真系有上堂学，所以算系克服咗。”但佢就话好彩拍摄剧集期间系秋天，未至于太过辛苦，“上年9月尾开始拍，天气都凉凉地，感觉都几好。”

在TVB拍剧出名辛苦，鲍姐就话无论边度拍剧都会辛苦，“今次虽然系挨更抵夜地拍，但每位演员拍完之后就好似吸毒咁，上哂瘾。唔记得咩系辛苦，留低都系最好嘅回忆，拍出嚟效果好好。”她表示今次拍剧好多时候都要拍到朝早，“系拍到直接食早餐，拍到讲对白到完全唔知自己讲紧咩，但呢啲都系好好嘅回忆。”

至于早前有报导指她拍完《同盟》后就不再拍无线剧，鲍姐就一笑置之，“唔好咁讲，始终拍剧又唔可以拍太多，年纪都开始大，但有好嘅剧集拍下都可以嘅。”咁睇嚟观众睇完《同盟》之后，都仲有机会睇到鲍姐的戏，佢之后又补充话，“拍咩剧都唔紧要，最重要有Jazz呢个咁好嘅监制，咁好嘅剧本，拍几多都愿意。”