梅启明被颁令破产冇钱过年　斥法庭官官相卫将上诉：打到底都要打

已故天后梅艳芳的胞兄梅启明，称2023年在铜锣湾“水门鸡饭”餐厅工作期间，左脚突然失重心倒地，入禀要求餐厅支付其工伤及拖欠他的工资，梅被裁定败诉兼上诉失败，须向餐厅付讼费。梅疑拒缴约4.7万元讼费，被涉事餐厅入禀高院要求颁令梅启明破产，高等法院法官今日（27）裁定他破产。

梅启明在庭上称现时两餐都成问题，承诺分期在半年内还款，惟呈请人拒绝，法官亦认为不合理，遂颁令梅启明破产，梅慨叹工伤案变破产是笑话。《01娱乐》联络梅启明，他在判决出炉后数小时决定上诉。他强调自己一直都申请紧法援，指：“我申请紧法援，法援仲未知道今日上庭，佢话嗌我上住先。我今日同个官讲好多嘢，佢都冇理会同埋冇去处理，完全冇畀机会。”

对于法院判决，他认为有偏袒，因此一定会告到底。他批评法庭做法，指自己遗产官司打了多年，什么官都见过，知道他们是盲目的，更谓：“难听啲讲，我乜嘢官都见过，有乜影唔影响，佢哋要做嘅嘢，围威喂，官官相卫我都冇得讲，我哋直话直说，真金不怕红炉火，打到底都要打！”他指自己21日见过官，对方冇指示他再交文件，但今日却指他做漏，又觉得是水门鸡饭一方的律师无论如何都要在今日逼到他破产，逼法官做嘢，而法官又听晒对方讲：“今日攞咗个陈情嘅文件畀佢佢冇睇，总之一意孤行。”

梅启明又指，自己受工伤以来，医生都有开假纸判定他的情况不适合返工，餐厅亦没有将他开除，换言之他仍是水门鸡饭员工，他要求餐厅按劳工法例支付4/5薪金，惟对方拖欠他20个月的薪金，他才无力摊还讼费，要求分期，“工伤期间佢都冇签过任何一分一毫，劳工处先至嗌我入禀告，产生呢个问题出嚟。无论点都好，我申请紧法援，你要畀时间接纳或者唔接纳，之后先至行呢一步都未迟。”问到医生开了多长的病假纸，他说：“分段嚟开，佢认为我仲未咩得到，咁咪继续畀假期我。我一路复诊做治疗，啱啱1月3号睇咗复诊，复诊完医生开去到7月11号。”

问到梅启明身家是否连$47,000讼费金额都冇，他承认：“咁就一定啦。”又坦言：“破咗产即系等于绑我手绑我脚，呢啲喺法例上面一啲都不合理。”讲到即将过农历新年，要食团年饭等等，他坦承冇钱过年，但乐观表示：“冇话影响大唔大，有粥食粥有饭食饭。有钱日日都系过年。（但系你冇钱。）冇钱咪又系咁过年啰。（会唔会同未婚妻食团年饭？）仲有咩食唔食团年饭，都系两餐啦。”月前他宣布娶泰籍女友查颂美，结婚要花钱，如今被颁令破产想必对婚事有所影响，不过梅启明说：“根本系两样嘢嚟，一样还一样。总言之有粥食粥有饭食饭，今日唔知听日事，哈。”