万千星辉2024｜视后龚嘉欣获珍姐煮饭：边有上司咁好，冇咗你唔得

《万千星辉颁奖典礼2024》今晚（19日）举行，大奖视后由《企业强人》龚嘉欣击败杨茜尧、张曦雯、林夏薇及姚子羚夺得，她泣不成声讲感受，致谢时更大爆与珍姐超友好关系，指对方唔闹自己就觉得唔重要，更多谢对方煮饭畀自己食。

龚嘉欣致谢全文：

我真系好似发梦一样，头先喺台下面睇得好开心，我冇谂过自己可以上到嚟争“最佳女主角”奖座，真系好有份量。首先我好想多谢公司16年来嘅栽培，好多谢珍姐，多谢乐小姐，多谢曾生，多谢主席！我好想多谢《企业强人》，多谢企业强人嘅监制Marco，编审Benny，好想多谢《企业强人》所有台前幕后嘅同事，如果冇你哋嘅话，唔会有方芳呢一个咁好嘅角色，我另外亦都好想Marco（罗永贤），你系一个好好嘅监制，你每一日都陪我共同进退，如果冇你喺度嘅话，我哋唔会有一个咁团结、咁齐心嘅团队去做到一个咁好嘅作品出嚟。我觉得真系一个好正嘅强人团队，多谢你！

跟住我好想多谢，我喺戏入面嘅拍档阿Mo，阿Sean， Kelly仲有John哥等等，冇你哋嘅话，我唔会咁有信心去演呢一个角色，所以我觉得呢一个奖系属于《企业强人》呢一个团队。我觉得我自己其实同方芳呢一个角色好似，我19岁就加入咗TVB，喺一路上我有好多嘅机会，亦都有遇到好多好好嘅人去帮助我，所以我今日喺呢一度亦都好想多谢每一位曾经同我共事过嘅同事，好多谢你哋嘅包容，亦都好想多谢畀过机会我嘅人，特别想多谢阿Jo陈维冠，好多谢你发掘咗我唔一样嘅一面，仲有几位嘅前辈我都好想多谢嘅，我想多谢祥哥（黎耀祥）、好多谢你教识咗我乜嘢系演员嘅专业，拍《杀手》嘅时候你孭住个假嘅肚腩，三十几度喺条街度跑足三十几次，你一个攰字都冇讲过，你教识咗乜嘢系演员嘅专业，Kent哥（郑则士），好多谢你，我细个嘅时候同你合作过《情越双白线》，你同我讲话你有睇过我所有嘅作品，你亦都有send message同我分析演技，呢个亦都系我受宠若惊，我冇谂过你会咁注意我呢一个小妹妹。仲有好想多谢阿Mo（陈豪），好多谢你，用你嘅经验去帮我，成日不厌其烦，成日send message烦住你唔好意思，因为我真系太多嘢想请教你，你真系一个好好嘅前辈，好好嘅朋友。

另外我好想多谢我经理人Winnie，好多谢你同我一齐去冲，好想多谢我以前经理人Sam，你陪咗我20年，因为工作我哋成为咗无所不谈嘅亲人，好想多谢Grace（陈凯琳），嘉颖同埋你𠮶三个仔，你同我讲你会喺电视𠮶度睇住我。我冇屋企人喺身边，但系你哋当我屋企人，逢亲大时大节一定会邀请我去你屋企食饭，仲有Zoie。多谢你哋，我觉得喺呢行好难遇到真心唔会当你系竞争对手嘅朋友，所以我好多谢你哋，仲有几位好多做我嘅好朋友，前辈，小青、龙哥、Evan，多谢你哋永远喺我软弱嘅时候，陪住我。我仲有好多谢每一位投票畀我嘅朋友，投票畀我嘅观众，如果唔系你哋嘅话，我今日真系冇机会可以企喺呢个台度。

最后，珍姐！多谢你！你真系我见过一个最有情义嘅人，我哋好多时候遇到好多问题，我哋第一个一定系揾你，因为我哋知道你一定会尽全力去帮我哋，虽然我成日都好惊，因为我知道你一定会闹我，但系我真系好钟意你闹我，你唔闹我我就会觉得我唔重要。好多谢你成日闹我，你圈我但系我都要多谢你，因为你真系一个会去用行动去帮我哋嘅人，成日都会将最好嘅嘢留俾我哋，为我哋嘅将来打算。你唔单止喺事业上面成日畀一啲意见我，你喺我人生上面亦都帮咗我好多，成日叫我要储钱，好多谢你！我好想借大家嘅掌声一齐多谢珍姐！珍姐，以后希望你继续带领我哋同公司一齐进步，冇咗你真系唔得，多谢珍姐！仲有边有上司会咁好煮饭畀人食，珍姐！以后轮到我煮饭畀你食，希望我唔会失礼《在家宴客50道菜》。最后，我嚟紧……我应承过你，我唔会再做妹仔钉，我要行出嚟话畀大家听，我经过咗16年喺公司嘅进步，我觉得我而家比以前更加有自信，用行动证明俾大家睇，我会系咁热爱我嘅演艺工作，多谢大家！