古淖文演唱会连周梁淑怡都支持　以陈蕾的《凡星》作结尾意义大

歌手古淖文的演唱会《古淖文 I'm Home 演唱会》香港站首场已于昨晚（11日）在麦花臣场馆圆满完成，全场爆满，周梁淑怡、何丽全、韦绮姗、周国丰、张佳添，以及古淖文于《亚洲星光大道》比赛时的一班战友均是座上客。

演唱会一开始 German 从升降台升到台上，并在接近十位的舞蹈员伴舞下唱出《偷情》、《烈焰红唇》、《桃色冒险》和《芳华绝代》，即时掀起了全场观众的高涨情绪。在换过另一套服装后，German 说：“大家好嘛？欢迎大家嚟到《古淖文 I’m Hme演唱会》香港站，真系冇谂过喺半年时间就可以开第二次演唱会，虽然主题都系叫 l’m Home，其实你当一个新演出嚟睇都得，因为上次系澳门就系 Broadway 为主线，今次就系为香港做一个新嘅 show，不过以下呢部份系澳门站系有出现过嘅，冇办法啦，呢啲系我嘅私心，点都要唱返自己歌俾大家听，以下呢首慢歌我都好钟意，希望大家都会钟意。”之后 German 便演译了四首属于他的自己歌包括《不相往还》、《古著》、《海底针》和《无底洞》。

在换过第三套衣服后，German 手拿闪令令咪Stand ，一口气唱出多首充满节奏感的歌曲包括《We Will Rock You》、《Are You Ready》、《Bay Boy》和《好戏在后头》，接著大萤幕上播出 German 去年于《中年好声音2》的夺冠片段，之后他便唱出由《多得他》、《明知故犯》、《深深深》、《恋恋风尘》和《心仍是冷》组成的《中2》参选歌 medley。

German 说：“嚟到呢一part就系中年好声音的部份，真系要好多谢呢一个节目，如果我冇参加呢个比赛，我相信唔单止呢两场演唱会，由我得到冠军到而家所得到嘅嘢都唔会拥有，所以请大家用最热烈嘅掌声俾中年好声音。讲起中年好声音，一路以嚟我哋都唱过好多歌，当中有一啲歌大家都好欣赏同好钟意，喺呢度都要拎返啲首本名曲嚟唱，不过喺未介绍我要唱嘅歌之前，我想特别多谢一班人，呢一班人就系我今晚嘅大乐队，我记得当我知道要喺香港麦花臣开演唱会嘅时候，我第一时间打俾音乐总监Donald，我同佢讲系时候过嚟坐阵啦，跟住我再同佢讲，如果可以嘅话，我希望呢两场演唱会可以请返睇中年好声音入面陪伴住我哋嘅每一位乐队成员，佢哋全部嚟晒两晚，多谢你哋陪住我哋喺中年好声音1，2，3 届走呢条音乐路，当然啦，我都要好多谢大家陪我哋由寂寂无名，由咸鱼翻生，到而家喺街度有人嗌得出我哋个名。感性嘅说话就讲完，咁而家就要唱一首首本名曲，因为喺度rundown 𠮶阵，想有多啲新元素俾大家睇，但知道大家买飞入场都想听返我喺比赛唱过嘅歌，所以我拣咗呢一首歌，呢首歌亦系我印象好深刻，如果我唔系唱咗呢首歌，我差啲已经俾人淘汰，大家亦唔会对我改观，我亦冇可能走到Final比赛，仲攞埋个冠军返嚟，我喺度再次唱呢首歌俾大家听：《盼望的缘份》。”

在舞蹈员的再度陪伴下，German 唱了《即食》、《护花使者》、《Para Para Sakura》和他的最新单曲《Follow Me》，然后在Encore 环节他逐一鸣谢冠名赞助和台前幕后团队以及现场嘉宾，German 说：“我要多谢嘅呢个单位真系好紧要，呢个单位系一个地方，呢个地方叫做香港，点解我要多谢香港？如果我真系冇踏出呢一步，鼓起勇气再次参加比赛，大家应该唔会记得古淖文呢一个人，亦都好难会听到古淖文呢一个名，所以我系好想喺香港唱一次以下呢首歌送俾香港，亦送俾大家，呢首歌就系叫做《狮子山下》。”

唱毕此曲后，German 说要特别多谢另外两个单位：“其中一个要多谢嘅单位系我父母，因为由我决定做歌手到今时今日，佢哋比我好大自由度去闯呢条路，我唔敢讲我而家好叻，只系有少少嘅成绩，但我会继续努力去唱多啲歌去报答我嘅爸爸妈妈；最后我要多谢呢个人正正就系我自己，我好多谢我嘅任性，因为如果我唔系一个极度任性嘅人，我应该一早放弃咗唱歌，好彩我冇放弃到，就系因为我冇放弃，我可以企到今时今日，所以人生就系咁，你以为冇嘅时候，偏偏又会见到一个窗口为你打开，决定系喺你手上，你敢去行你嘅前路就会一片光明，我唔讲太多啦，我好想藉住呢首歌话俾大家听一定要爱自己。”最后 German 以“亚洲星光大道”其中一位好友陈蕾的一曲“凡星”为首晚香港个唱划上了圆美句号。

在接受媒体访问时 German 表示开show 前多健身 keep fit，因不单止是要身体线条靓，而且要有充足体能去应付整晚演出，父母给他很高的分数并说是 very good show，不过对他来说唱了那么多 rock 歌也是一种挑战，至于他在台上有感而发提及Haters，German 说：“他们对我嘅人身攻击已经冇乜用，由细到大都听唔少，如果讲人𠮶个讲完呢番说话会令佢自己心情好d，咁佢咪讲啰，我真系冇乜所谓。点样令自己放开，真系冇乜方法，容许我粗俗讲一句只可以硬食，特别系做我哋呢行，唱得好会俾人话，唱得唔好就会俾人话咁样都去做明星，调节自己嘅心理非常紧要，拣得做呢一行一定会有好多人俾意见你，要靠自己去衡量好与坏，自己要去选择分辨边啲系好嘅意见，我喺网上评论都见到一啲有建设性嘅建议。”

German 最后表示最意想不到的是周太周梁淑怡亲临支持，真的完全没有想过，而拣选了陈蕾的《凡星》作为演唱会最后一首歌是因为这首歌意义非常大，特别是歌词中那一句“谁都可发光只要找对地方”，原本还想在台上分享多一点，但因时间关系只能留待尾场实现。