支喾仪自爆成功搣甩买名牌包包瘾　全靠呢样嘢老公都要讲多谢

支喾仪（Venus）今日（11/1）现身将军澳出席《无烟车乐部》启动礼。提到农历前家居大扫除，Venus接受《香港01》访问时表示：“其实我就最钟意就系断舍离，好朋友成日嚟到我屋企都会见到好整齐，佢哋会问我系咪住喺度，点解会咁干净，而且有个5岁大嘅小朋友，点样可以做到。因为我个厅成个柜都系放小朋友嘅玩具，变咗佢哋系唔会见到任何玩具嘅足迹。同埋见到有啲嘢坏咗唔用得，我系会好舍得掉。”

被问到家中名牌包包会否被“大扫除”，Venus笑言：“包包系用嚟衬衫，加上都未烂，所以我系未掉。如果唔用嘅包包，我系会用个大箱装住，然后用布袋入住。（用大箱装，数量应该好多！）其实我系同阿妈共用，阿妈𠮶啲又畀我用，有时买完都会畀阿妹用。（有冇计过数量？）咁又冇㖞，可以化妆品多啲。（你买咁多包包老公冇话你咩？）老公可能会哎呀买少个啦。（冇计过一年买几多个包包，见到钟意就买？）钟意就买⋯⋯⋯不过讲真呢两年真系冇购物意欲，因为我将所有嘅欲望都放喺我嘅歌曲上面，加上又参演《爱回家》拍摄工作，又做直播，真系好忙。系忙到个注意力喺囝囝同屋企度，根本系冇时间谂买嘢。连我老公都话要多谢《中年好声音》，连佢都会话喺香港行街都见唔到我话要去买包呢个习惯，反而去到外国，我都只系买啲好地道嘅食物返香港做手信。”