193被批黑面冇奖攞　寸嘴回复获封“Hater教育家”网民叫姜涛学嘢

ERROR成员郭嘉骏（193）一向以敢言见称，几年前一句“关你咩事呢毒X”成为网上万能Key，而近日又有网民挑衅他，指他唱歌难听、黑口黑面、永远冇奖攞等等，193都有耐性驳返对方转头，网民就封他为“Haters教育家”，更指早前在台上说：“唉，又要俾人闹”的姜涛，应学习193应对Haters的态度。

《2024年度叱咤乐坛流行榜颁奖典礼》当晚，有网民Cap低坐在台下的ERROR，发文：“其实193首首歌都X口X面系想点？”193就转发了该贴文，回应：“寻晚开场前先话以后所有颁奖礼都要戴黑超先得”而发文者未有放过193，留言说：“你唱歌咁难听 连歌手席都无资格坐”193就开始寸嘴说：“咦，但系我真系坐紧喺度，毒X系接受唔到现实吗？”该网民不止一句寸193冇奖攞，但193就谓：“年年都冇奖攞㗎啦，你觉得咁样就攻击到我吗？我赚到钱买跑车买我自己钟意嘅嘢就已经开心满足㗎啦，咁你呢 ？系咪好叻㗎 ？讲嚟听吓等我开心吓。”

该网民再寸193冇奖攞，表示：“坐系（喺）度岩（啱）晒你 你永远唔系企系（喺）度攞奖果个”193再详尽回复：“嗱，首先同你讲声我喺自己公司颁奖典礼系攞过奖嘅，你可以学吓用Google搜寻一下。第二就系呢，其实你都一样系坐喺度，只不过你坐喺屋企打字，而我就坐喺颁奖典礼歌手席度睇show咁解，所以正确啲嚟讲，我哋两个坐喺度嘅高度都完全唔同。再者，你觉得话我坐喺度系攻击到我吗？😂讲真，我坐咗咁多年你觉得我介意吗？😂你有咁多时间去憎恨一个人，不如试吓去谂吓自己点解咁废，然后努力啲好过啦，加油兄弟，我要去做嘢了，唔能够做你人生导师咁耐”。

该网民斥：“讲紧叱咤（咤）你又讲其他，自己公司个个都有奖攞啦，viu自己慢慢打X机啦。”193虽然本身话要去做嘢，但都不厌其烦再回复：“如果你话自己公司个个都有奖，咁你就得罪紧好多艺人啦。每年啲奖就系得咁多个，总有好多人攞唔到奖，同埋我哋系公开投票结果嘅，有咩唔识就可以Google学一下，唔系净系X噏，都要增进下自己嘅眼界见识，同埋点解净系讲紧叱咤？我每个show都系咁嘅样㗎㖞，你呢？你连样都唔够胆post系咪因为好怕自己网上嘅言论会被身边嘅同事朋友笑呀？定系你现实世界根本冇朋友所以要网上攻击人去得到认同感咁惨？ ”该网民就未有再回应。

193的言论获不少人认同，被指黑口黑面，洪卓立就说：“我唔系想博咩所以留言，但我想讲我都比人闹过。个个专心嘅样都唔同，无表情唔代表唔专心唔尊重，我睇陈奕迅演唱会，擘大只眼啤住佢添。”很多网民亦觉得193面对Haters的心理很强大，大赞他是“Haters教育家”，网民发文说：“193面对网民嘅心态同姜涛真系两个世界”、“193个心态非常适合演艺呢行”；姜涛近年常常成为被网民攻击的对象，使他在台上都变得欠缺自信，攞奖都怕被骂，日前在《叱咤》夺得“我最喜爱的男歌手”时，甚至以“唉，又要俾人闹”作为得奖感受，并恳求打字中的网民手下留情。

有网民认为姜涛应效法193的态度，不过有人就不同意，指：“我肯定如果姜涛咁覆，一定俾人鞭得更甘。 193可以唔代表姜涛可以，每个人嘅性格同背负亦唔同。”、“如果姜涛咁样覆，应该会引发网络世界大战加新闻无限上纲上线批斗几个月。”网民所讲也不无道理，毕竟姜涛前排只说了“冇品”两字已引起好大风波。