宇宙天团成员爆ViuTV底薪 试过9年无正职月尾要问屋企人攞钱
34岁的何启华(Dee)，2014年先伙游学修组成“学舌鸟”扮刘德华为人认识，其后2018年参加首届《全民造星》后加入男团ERROR火速爆红。ERROR成军六周年将于1月25日举行会展骚外，最新亦推出团体首支跳唱歌《野舞士》。身为副队长的Dee接受商台《星光背后》专访。
节目中，Dee直认中学时已立志做演员，欲投考演艺不果后，他为等机会，只要有收入什么都愿意做。当年参加首届《造星》，他坦言：“目的我只系想话畀人知我响度！”至于由ViuTV组成MIRROR及ERROR前，原来何启华已伙好友杨乐文(Lokman)及王智德(Alton)向高层自荐组三人组合出道，不过最终好兄弟入MIRROR，而自己却被编入了ERROR，Dee说：“庆幸自己冇入到MIRROR！”
长期粮尾要问屋企人借钱
六年前参加《全民造星》，Dee形容是星途大改写，全因他之前八、九年都无正职，“我中五毕业𠮶一年都有返过正职嘅，侍应、Sales、卖衫，我都做过，但系我做乜都唔及我响舞台做得好，咁有满足感。”
当年参战《造星》，Dee 已28岁，面对父母及负起养家责任的兄长，除了存感激的心，更多的是内疚，“眼见哥哥养家，而我自己随住年纪长大而成就向下跌，我会反问自己系咪浪费时间，月尾总系无钱洗要问屋企人攞，果阵不断重复，好地狱，但个天又好奇怪，到我想放弃又有啲机会出现留住我，一年总有一、两套舞台剧揾我做chorus，总系心灰意冷果时又有电话揾我做，当时我涉猎MC、跳舞、舞台剧，帮人宣传游戏game扮丧尸，总之同表演有关我都做。点解？因为无钱啰！过程都系锻炼苦中作乐。父母有无压力？我会形容系季节性，佢哋忍到夏天，又忍唔到个春天。《造星》最后签ViuTV，最初几千蚊底薪都好，佢哋终于放心，系因为我终于有份正职！不过都真系要多谢父母，佢哋好传统，好锡自己小朋友，无得食都要畀小朋友食。”
兄弟班无缘组队
Dee当年伙两位跳舞好兄弟Lokman及Alton一起参赛《造星》，没想过要争冠军，“目的我只系想话畀人知我响度！”最终他30强止步，但原来十强决赛前，他与两兄弟已向高层自荐组成组合，“而家应该可以讲，我捉住高层话我哋可以做呢啲，又可以做个啲！不如俾我哋三个试下整个组合。到节目尾声，听到有个组合要诞生，本身以为得米啦，以为就系我哋三个一齐做个组合。系后来先知我哋要入唔同组合，我入ERROR，佢哋就入MIRROR。”被问到自己无缘入MIRROR，他说：“无唔开心！我反而庆幸自己冇入到MIRROR，佢哋两个适合做偶像派，比我更适合，我会话自己似entertainer多过idol。”
与ERROR成员要时间磨合
ERROR自封为“宇宙天团”，成军六年，Dee 坦承经历过不少磨合，“𠮶阵我哋四个分咗两边咁，好多拗撬，但好彩我哋都系男人，有啲咩就会三口六面闹清楚，系讲晒粗口果只。如果我哋系女仔嘅话，应该会扯头发添！之后我哋啲嘢就越行越顺，有钱就齐齐揾，一齐经历咗好多嘢。”他披露保锜经历低潮期时，曾想放弃事业，最终四人互相扶持跨越难关，Dee说：“系一齐捞返起佢，我地同佢讲你肯玩就一齐玩，你畀人雪藏，咪用个雪柜推佢出嚟，畀佢知道home sweet home，我地系屋企人，你当我同事又好，系合约精神又好，我哋四个系绑埋一齐架嘛，如果我哋想害你，咪即系害埋自己？”
请按下图睇更多AI何启华：