黄凯芹爆杜自持对音乐严谨　曾有歌手录音电话响被粗口闹爆

歌手黄凯芹（Chris )和著名音乐人杜自持(杜Sir)今日（28/12）现身九龙湾音乐室为演唱会《唱·2025LIVE 》练歌。Chris接受《香港01》访问时表示：“其实我识咗阿杜Sir都几十年，记得我成世人第一次喺红馆开演唱嘅时候，佢系我音乐总监，同佢系有一份情意结喺度，当我知道戏曲文化中心有期，就即刻谂到同杜Sir一齐搞呢次嘅演唱会，因为大家嘅音乐风格都好似，而今次主办方就即刻揾杜Sir，而佢亦都好快就应承咗，令我确实好意外。”

提到二人对音乐的执着，杜Sir笑言：“其实佢都好执着，不过我都系一样，变咗就有好多火花。因为我觉得好嘅嘢系要雕琢嘅，唔会话一出嚟就系好，变咗我又改啲嘢，你又改啲嘢，出到嚟就会有一个好好嘅作品。”被问到最后妥协是谁？Chris笑言：“因为我系歌手，变咗我唔回答呢个问题，我从置身到外咁睇，杜Sir永远对啲乐队嘅成员都好严谨，但对歌手从来都唔会开声话对方。只系对嘅乐队嘅成员会呢样唔得，𠮶样唔得。”

杜Sir接著解释：“其实如果咁样当话个歌手，对方好难落台，同埋唔想令到双方关系唔舒服，变咗咁样好难再合作落去，咁所以尽量就避免，除非佢错得好离谱，咁样我就会出声啰。记得喺好耐之前，曾经发生过一件事，有一位歌手嚟到录音室练紧歌，突然之间有电话响，𠮶一刻我就火都嚟，当众粗口横飞闹边个电话喺度响，个歌手就即刻埋去熄咗部电话，𠮶一刻我先知道原来系佢，𠮶句说话讲咗又唔可以收返，当时场面都好尴尬。之后呢个歌手冇再揾我再合作。事后我都有检讨，以后应该喺说话上唔好咁直接，咁样对方都会容易啲接受。（有冇见返佢？）有，见到面大家都有倾有讲，只不过冇再合作咁解。”